+
+
Shares

माधवले प्रस्ताव गरे नेता–कार्यकर्ताका लागि ८ दायित्व

केन्द्रीय कमिटी बैठकमा अध्यक्ष नेपालले पार्टीका नेता–कार्यकर्ताले गर्न हुने र नहुने कामहरूको सूची समावेश प्रस्ताव ल्याएका छन् ।

अनलाइनखबर अनलाइनखबर
२०८१ फागुन ९ गते १७:५२

९ फागुन, काठमाडौं । नेकपा एकीकृत समाजवादीका अध्यक्ष माधवकुमार नेपालले पार्टी पंक्तिले पालना गर्नुपर्ने आचारसंहिताको प्रस्ताव ल्याएका छन् ।

शुक्रबारबाट सुरु भएको केन्द्रीय कमिटी बैठकमा अध्यक्ष नेपालले आचारसंहिताको प्रस्ताव प्रस्तुत गरेका हुन् । ३ पेजको संक्षिप्त आचारसंहितामा अध्यक्ष नेपालले पार्टीका नेता–कार्यकर्ताले गर्न हुने र नहुने कामहरूको सूची समावेश गरेका छन् ।

‘… एकीकृत समाजवादीका नेता तथा कार्यकर्ताको आचरण र व्यवहार पार्टीले अँगालेको क्रान्तिकारी सिद्धान्त अनुरुप बनाउन आचार संहिता मार्फत निर्देशन गर्नु उपयुक्त हुने भएकाले…,’ संहितामा भनिएको छ ।

अध्यक्ष नेपालले एकीकृत समाजवादीका नेता–कार्यकर्ता ध्यान दिनुपर्ने कामहरूलाई बुँदागत रूपमा राखेका छन् ।

मूल्य मान्यता

मार्क्सवाद–लेनिनवादलाई पार्टीले मार्गदर्शक सिद्धान्त मान्ने भएकाले सबै किसिमका विभेद र शोषणको विरुद्ध आवाज उठाउनु पार्टीका नेता–कार्यकर्ताको मूल्य मान्यता हुने प्रस्ताव गरिएको छ ।

‘श्रमको सम्मान गर्ने, श्रम शोषण नगर्ने, आफैं पनि श्रम गर्ने, सबै किसिमका शोषण, दमन र अन्याय अत्याचारको विरोध गर्ने, सबै किसिमतको विभेद र असमानताको विरोध गर्दै समानताको पक्षपोषण गर्ने र समाजको आर्थिक–सामाजिक–सांस्कृतिक रुपान्तरण अर्थात् आमूल परिवर्तनमा गर्न निरन्तर लागि पर्ने’, आचारसंहितामा भनिएको छ ।

आचरण

खानपान, रहनसहन, बसउठ आदि सरल र सामान्य हुनपर्ने प्रस्ताव गरिएको छ ।

नैतिकता

सामूहिकतावादमा विश्वास गर्ने र श्रमजीवीको सेवामा समर्पित हुने प्रस्ताव अध्यक्ष नेपालले गरेका छन् । ‘हामीले व्यवहारमा यही कम्युनिष्ट नैतिकता प्रदर्शन गर्नुपर्दछ, गर्नेछौं । परपुरुष–परस्त्री शारीरिक सम्बन्ध राख्ने र विवाहपूर्व तथा वैवाहिक सम्बन्धबाहिर शारीरक सम्बन्ध राख्ने कार्य अनैतिक मानिन्छ’ संहितामा भनिएको छ, ‘कम्युनिष्ट पार्टीका नेता तथा कार्यकर्ताले यस्तो अनैतिक कार्य गर्नु हुँदैन ।’

व्यवहार

‘सादा जीवन, उच्च विचार’लाई सूत्र मान्नुपर्ने प्रस्ताव पार्टीमा राखिएको छ । बोल्दा अश्लील र अपशब्दको प्रयोग नगर्ने एवं विभेद हुने गरी अभिव्यक्ति दिन नहुने प्रस्ताव गरिएको छ ।

‘… आर्थिक जीवन र व्यवहार पारदर्शी हुनुपर्दछ । उनीहरूले अनैतिक कृयाकलाप गरी कुनै आर्जन गर्नु हुँदैन’, माधव नेपालको प्रस्ताव छ ।

जिम्मेवारी बहन

पार्टीले दिएको जिम्मेवारी बहनलाई नेता–कार्यकर्ताको आचारसंहिताभित्र राखिएको छ । ‘आफूलाई प्राप्त जिम्मेवारी पूरा गर्न पार्टीका हरेक नेता तथा कार्यकर्ता दत्तचित्त भएर लाग्नुपर्दछ । जिम्मेवारी बहन नगरेका खण्डमा कारबाहीको विषय बन्नेछ’, प्रस्तावमा लेखिएको छ ।

जवाफदेही

आफूले गरेको कामप्रति जवाफदेही हुनुपर्ने विषय संहितामा छ ।

अध्ययनशील बन्ने

कम्युनिष्ट पार्टीका सदस्यलाई अध्ययनशील हुनुपर्ने मान्यता स्वीकार्न नेता–कार्यकर्तासँग प्रस्ताव गरिएको छ ।

सीमा ननाघ्ने

जनवाद र अनुशासनको सन्तुलन मिलाउनुपर्ने प्रस्ताव छ । पार्टी सदस्य भइसकेपछि जथाभावी बोल्न नपाइने तथ्य बुझ्न आग्रह गरिएको छ । ‘पार्टीका आन्तरिक छलफलमा हरेक सदस्यले स्वतन्त्रतापूर्वक पार्टीका हरेक विषयमा बोल्न र मत राख्न पाइन्छ । तर, पार्टीका निर्णयविरुद्ध आफ्नो पार्टी कमिटीभन्दा बाहिर गएर बोल्न र मत रख्न पाइँदैन’, संहितामा उल्लेख छ ।

यो खबर पढेर तपाईलाई कस्तो महसुस भयो ?
Khusi chhu

खुसी

Dukhi chhu

दुःखी

Achammit chhu

अचम्मित

Utsahit Chhu

उत्साहित

Akroshit Chhu

आक्रोशित

प्रतिक्रिया

भर्खरै पुराना लोकप्रिय
Advertisment

छुटाउनुभयो कि ?