११ फागुन, काठमाडौं । ओडिसाको कलिंगा इन्स्टिच्यूट अफ इन्डस्ट्रियल टेक्नोलोजी (केआईआईटी) मा नेपाली विद्यार्थीको मृत्युपछि सिर्जित परिस्थितिका कारण कलेज छाडेका विद्यार्थीहरुमध्ये केही फर्किएका छन् ।
दिल्लीस्थित नेपाली दूतावासबाट ओडिसामा खटिएका कन्सुलर सञ्जीव शर्मा दासका अनुसार, अहिले कलेजमा फर्किएर आएकासहित १८२ जना विद्यार्थी छन् । यद्यपि, कलेजमा १ हजार १६९ नेपाली विद्यार्थी पढ्दै आएका थिए ।
‘घटनापछि उहाँहरु विभिन्न ठाउँमा जानु भएको थियो, अहिले कलेज प्रशासनले पनि विद्यार्थीलाई फर्काइदिन भनेर अभिभावकलाई इमेल लेखेको छ’, उनले अनलाइनखबरसँग भने, ‘यस्तोमा सुरक्षाको प्रत्याभूति समेत गराइएकाले विद्यार्थीहरु फर्किन थालेका छन्, विस्तारै अरु विद्यार्थीहरु पनि आउनु हुन्छ ।’
यद्यपि, एक विद्यार्थीका अनुसार, भारतमै रहेकाहरु फर्किइरहे पनि नेपालसम्म आएकाहरु अझै फर्किन तयार छैनन् । उनीहरुले निष्पक्ष छानबिन, कम्प्युटर साइन्सका निर्देशकमाथि अनुशासनको कारबाही लगायतका विभिन्न बुँदे माग राखेका छन् ।
नेपाली विद्यार्थीहरुको मनस्थिति बुझेपछि केआईआईटीले आगामी सेमेस्टरको परीक्षा पनि सार्ने भएको छ । ओडिसाका उच्च शिक्षामन्त्री सूर्यवंशी सुरजले प्रदेशसभामा बोल्दै आवश्यकताअनुसार परीक्षाको नयाँ मिति तोकिने भनेका छन् । ‘सरकारले नेपाली विद्यार्थीलाई भविष्यमा केआईआईटीबाट कुनै समस्या नहोस् भन्ने विषयलाई विशेष प्राथमिकता दिनेछ’, उनले भनेका छन् ।
केआईआईटीको गर्ल्स होस्टलको कोठामा आइतबार रुपन्देही स्थायी घर भएकी नेपाली विद्यार्थी २० वर्षीय प्रकृति लम्साल मृत अवस्थामा भेटिएकी थिइन् । कलेज प्रशासनले उनले आत्महत्या गरेको भन्दै यो प्रकरणलाई सामान्यीकरण गर्न खोजेको थियो ।
लम्सालले दुई पटक आफूमाथि बीटेक तेस्रो वर्षमा पढ्ने २१ वर्षीय अड्विक श्रीवास्तवले मानिसक यातना दिइरहेको भन्दै इन्टरनेश्नल रिलेशन अफिसर (आईआरओ) लाई निवेदन दिएकी थिइन् । पहिलो पटक उनलाई केही दिन कलेजले निलम्बनमा राख्यो । तर, अड्वीकले उनलाई यातना दिन छाडेनन् । फेरि उनले आईआरओलाई निवेदन दिइन् ।
प्रशासनले अझै गम्भीरतापूर्वक नलिँदा आफ्नो बहिनीको ज्यान गएको दाइ सिद्धान्त सिग्देलले अनलाइनखबरसँग बताएका छन् ।
उनका अनुसार, कलेजलाई सबै विगत थाहा थियो, दुई पटक उजुरी दिँदा पनि आइन्दा बहिनीसँग सम्पर्कमा नरहन भनेर लिगल एक्सन नलिइ छाडेको थियो । त्यसको परिणाम आइतबारको घटना हो ।
आइतबार अपराह्न ३ देखि ४ बजेको आसपासमा उनको शव कलेजको छात्रावासमा भेटिएको थियो । त्यहाँ अध्ययरत् नेपाली विद्यार्थीहरुका अनुसार, प्रकृतिको कोठामा उनका अरु दुई जना साथीहरु पनि सँगै बस्दै आएका थिए । तर, घटना भएका बेला दुवै जना बाहिर थिए ।
प्रकृतिको मृत्यु भएको जानकारी पाएलगत्तै आरोपी श्रीवास्तव आइतबार राति नै भागेर घरतिर जान खोजेका थिए । कलेजका नेपाली विद्यार्थीहरुले त्यसबारे थाहा पाएसँगै हल्लीखल्ली गरेका थिए । त्यसक्रममा उनले राति साढे ८ बजे विजुपटनायक अन्तर्राष्ट्रिय विमानस्थलबाट कोलकाताको सुवासचन्द्र बोस अन्तर्राष्ट्रिय विमानस्थल जानलाई टिकट काटेको फेला परेको थियो ।
तर, विद्यार्थीको प्रदर्शन र दबाबबीच उनको टिकट रद्द भयो भने प्रहरीले उनलाई त्यहीँबाट पक्राउ गरेको थियो ।
विद्यार्थीमाथि कलेजको अमानविय व्यवहार
यो घटना अहिले प्रकृतिको मृत्यु र अनुसन्धानमा मात्र सीमित छैन । प्रकृतिको मृत्युपछि न्याय माग्ने विद्यार्थीहरुलाई कलेजले गरेको दमनले सामाजिक सञ्जाल तातेको छ ।
न्याय माग्नेहरुमाथि लाठी बर्साउन आदेश दिने कलेजका अधिकारीहरुमाथि प्रश्न उठेको छ । यो घटनाले ओडिसाको अन्तर्राष्ट्रिय छविमै असर गरेको भन्दै ओडिसाको विधान सभामा समेत प्रश्न उठेको छ । संसद्मा कुरा पुगेपछि प्रदेश सरकारले छानबिनका लागि उच्चस्तरीय समिति बनाएको छ ।
अहिले विद्यार्थीलाई कुटपिटमा संलग्न केही पक्राउ पनि परेका छन् । यो मामला चर्किएपछि स्थानीय प्रहरी र प्रशासनले लिएको पहलकदमी उत्कृष्ट भएपनि कलेजले देखाएको व्यवहारका कारण विद्यार्थीहरु अझै त्रासमा रहेको दिल्लीस्थित दूतावासका अधिकारीहरु बताउँछन् ।
कलेजका एक जना नेपाली विद्यार्थीका अनुसार, त्यहाँ अधिकारीहरुले कलेजका साखमा असर पर्ने भन्दै लम्साल मृत्यु प्रकरणलाई ढाकछोप गर्न खोजेका थिए । त्यही कारण विद्यार्थीले प्रदर्शन गर्दा उनीहरुको माग सम्बोधन गर्नु साटो कलेजका सुरक्षाकर्मी प्रयोग गरेर उल्टै पिट्ने र तर्साउने काम गरेका थिए ।
सोमबार दिउँसो केआईआईटी प्रशासनले सूचना नै जारी गरेर नेपाली विद्यार्थीलाई कलेज र होस्टल छाडेर जान उर्दी जारी गरेको थियो ।
नेपाली विद्यार्थी बसेको कोठा कोठामा पुगेर बाउन्सरहरुले ढक्ढक्याउँदै विद्यार्थीलाई निकालेका थिए । प्रतिवादी गर्दा लाठीले विद्यार्थीहरुलाई हानेको थियो । त्यसपछि नेपाली विद्यार्थीहरु झन् समस्यामा परेका थिए ।
प्रतिक्रिया 4