जर्मनीको चुनावमा फ्रेडरिक मर्जको पुनरागमन, तर सरकार गठन चुनौतीपूर्ण

१२ फागुन, काठमाडौं । जर्मनीमा सम्पन्न संसदीय चुनावमा रुढीवादी पार्टी क्रिश्चियन डेमोक्रेटिक युनियन (सीडीयू) सबैभन्दा ठूलो पार्टी बनेको छ ।

तर पूर्णबहुमत नपाएकाले उसले सरकार बनाउन अरु दलसँग गठबन्धन गर्नुपर्ने भएको छ । गठबन्धन गर्न सीडीयू नेता फ्रेडरिक मर्जका लागि चुनौती हुने आँकलन छ ।

अन्तर्राष्ट्रिय समाचार एजेन्सीहरुका अनुसार सीडीयू गठबन्धनले २८.५ प्रतिशत मत प्राप्त गर्दै पहिलो स्थान हासिल गरेको छ ।

यसैगरी दक्षिणपन्थी पार्टी ‘अल्टरनेटिभ फर जर्मनी’ (एएफडी) ले २०.६ प्रतिशत मत प्राप्त गर्दै ऐतिहासिक प्रदर्शन गरेको छ । पछिल्लो चुनावको तुलनामा यसपटक सो पार्टीको मत दोब्बरले बढेको छ । यसैगरी समाजवादी पार्टी (एसपीडी)ले १६.४ प्रतिशत मत पाएको छ ।

अहिलेसम्म कुनै सरकारी पद नसम्हालेका ६९ वर्षीय फ्रेडरिक मर्ज अब जर्मनीको चान्सलर बन्ने तयारीमा छन्। तर उनले एएफडीसँग कुनै पनि प्रकारको गठबन्धन नगर्ने बताएका छन् ।

उनले भनेका छन्, ‘हाम्रो पार्टी लोकतान्त्रिक र समावेशी मूल्यमा आधारित छ । एएफडीको नीतिहरू हाम्रो दृष्टिकोणसँग मेल खाँदैन ।’ अन्य प्रमुख दलहरूले पनि एएफडीसँग कुनै सहकार्य नगर्ने जनाएका छन् ।

त्यसैले मर्जका लागि अब उपयुक्त गठबन्धन निर्माण नै सबैभन्दा ठूलो चुनौती बन्न सक्ने अनुमान गरिएको छ ।

विश्लेषकहरूका अनुसार, १६.४ प्रतिशत मत पाएको समाजवादी पार्टी (एसपीडी) सँग गठबन्धन गर्ने सम्भावना देखिए पनि वैचारिक भिन्नताका कारण वार्ता कठिन हुन सक्ने अनुमान छ । जर्मनीको युरोपेली संघमा भूमिका, युक्रेन युद्ध नीति र चीनसँगको व्यापारिक सम्बन्ध जस्ता विषयहरू गठबन्धन वार्तामा मुख्य चुनौती बन्न सक्ने बताइएको छ ।

तर मर्जले जर्मनीका प्रमुख सञ्चारमाध्यम एआरडीसँग कुरा गर्दै सम्पूर्ण देशको प्रतिनिधित्व गर्ने सरकार बनाउने बताएका छन् । उनले भनेका छन्, ‘हामीले चुनाव जितेका छौं, अब सरकार निर्माणको जिम्मेवारी हाम्रो हो । म यस्तो सरकार बनाउन चाहन्छु, जसले सम्पूर्ण देशको प्रतिनिधित्व गरोस् ।’ त्यसैले जर्मनीमा अब कस्तो सरकार बन्छ भन्ने चासो छ ।

सरकार गठनमा ढिलाइ भए अस्थिरता बढ्ने चिन्ता

राजनीतिक विश्लेषकहरूले यदि गठबन्धन चाँडै बन्न नसके जर्मनीमा राजनीतिक अस्थिरता बढ्ने चेतावनी दिएका छन् । यसको प्रभाव केवल जर्मनीमा मात्र सीमित नरहेर, सम्पूर्ण युरोपेली अर्थतन्त्र र अन्तर्राष्ट्रिय बजारमा समेत पर्ने अनुमान छ ।

अबको केही हप्तासम्म गठबन्धन वार्ताहरू जारी रहनेछ । यदि सहमति समयमै हुन सकेन भने जर्मनी राजनीतिक अनिश्चिततामा फस्न सक्ने खतरा छ ।

यसैबीच अमेरिकाका पूर्वराष्ट्रपति डोनाल्ड ट्रम्पले जर्मनीको चुनावी नतिजालाई स्वागत गरेका छन् । उनले यो परिणाम जर्मनी र अमेरिकाका लागि ‘उल्लेखनीय’ भनेका छन् ।

उनले आफ्नो सामाजिक सञ्जाल प्लेटफर्म ‘ट्रूथ सोशल’ मा लेखेका छन्, ‘जसरी अमेरिका ऊर्जासम्बन्धी नीति र आप्रवासनको गलत निर्णयबाट आजित भइसकेको छ, त्यस्तै जर्मनीका जनताले पनि अब परिवर्तन चाहन्छन् ।’

मर्जको राजनीतिक पुनरागमन

मर्जका लागि यो जित एक असम्भाव्य ‘कमब्याक’ हो। सात वर्षअघि उनलाई राजनीतिबाट पूर्णरूपमा अलग भइसकेको मानिन्थ्यो। उनी सफल व्यवसायीका रूपमा विभिन्न कम्पनीका बोर्ड सदस्य तथा लबिस्ट बनेका थिए।

स्वर्गीय वोल्फगाङ श्वाएब्लका अनुयायीका रूपमा चिनिने मर्ज जर्मनीका वित्तीय अनुशासनका कट्टर समर्थक मानिन्छन्। उनी २००० को दशकमा क्रिश्चियन डेमोक्रेटिक पार्टी (सीडीयू) का संसदीय नेता बनेर चर्चामा आएका थिए।

उनको व्यक्तित्व परम्परागत रूढिवादी नेताको रूपमा चिनिन्छ। मर्ज १९८९ मा पहिलो पटक युरोपेली संसदमा निर्वाचित भएका थिए।

पश्चिमी जर्मनीको सामाजिक रूपले परम्परागत ‘साउअरल्याण्ड’ क्षेत्रका मूल निवासी मर्ज पश्चिम जर्मनीको पूर्वी जर्मनीसँगको पुनर्एकीकरणअघि लोकप्रिय नेता थिए।

तर, जर्मनी एकीकरणपछि राजनीतिमा प्रवेश गरेकी एङ्गेला मर्केलले मर्जलाई आफ्नो बाटोबाट हटाउँदै चान्सलर बन्न सफल भएकी थिइन्।