प्रतिसेयर आम्दानी धेरै भएका यी १० कम्पनी

१२ फागुन, काठमाडौं । दोस्रो बजारमा कुल २४६ कम्पनीको सेयर कारोबार हुँदै आएको छ ।

यीमध्ये करिब सबैजसो कम्पनीले चालु आर्थिक वर्षको दोस्रो त्रैमासिक वित्तीय विवरण सार्वजनिक गरेका छन् । वित्तीय विवरणमा उल्लेख हुने प्रतिसेयर आम्दानी (ईपीएस) सेयर लगानीकर्ताका लागि महत्वपूर्ण सूचक मानिन्छ ।

कम्पनीले नाफा गरेको रकमलाई जारी भएको सेयर संख्याले भाग गरेपछि प्रतिसेयर आम्दानी निस्किन्छ । लगानीकर्ताको एक कित्ता सेयरवापत कम्पनीले गरेको आम्दानी नै प्रतिसेयर आम्दानी हो ।

कम्पनी सञ्चित नोक्सानीमा नरहेको अवस्थामा प्रतिसेयर आम्दानी जति धेरै, त्यति नै बढी प्रतिफल पाउने सम्भावना रहन्छ ।

प्रतिसेयर आम्दानीका आधारमा अब्बल १० कम्पनीमा ७ सेक्टरका एउटा पनि पर्न सकेका छैनन् । बैंकिङ, विकास बैंक, फाइनान्स, होटल तथा पर्यटन, अन्य, व्यापार, जीवन बीमा सेक्टरका एउटा पनि पर्न सकेको छैन ।

ईपीएसका आधारमा टप १० कम्पनीमा माइक्रोफाइनान्स सेक्टरका सबैभन्दा धेरै ४ वटा पर्न सफल भएका छन् । त्यस्तै दुई हाइड्रोपावर कम्पनी, एक लगानी, दुई उत्पादन र एक निर्जीवन बीमा कम्पनी छन् ।

बजारमा सबैभन्दा धेरै प्रतिसेयर आम्दानी भएको कम्पनी युनिलिभर नेपाल हो । मूल्यका आधारमा पनि यो सबैभन्दा महँगो कम्पनी हो ।

प्रतिसेयर आम्दानीका आधारमा अब्बल १० कम्पनी

कम्पनी	वार्षिक प्रतिसेयर आम्दानी	बजार मूल्य
युनिलिभर नेपाल	२,१८१.९८	४६,५००
राष्ट्रिय बीमा कम्पनी	२६०.०४	१५,१३२
महिला लघुवित्त	६७.३७	२,४३९
नेपाल ल्युब आयल	६०.२९	२५१.८०
सीईडीबी होल्डिङ्स	४०.५१	२,३८५
माउन्टेन इनर्जी	३९.३५	६०१
ग्लोबल आईएमई लघुवित्त	३८.२४	१,३८०
ग्रामीण विकास लघुवित्त	३७.६३	९१४
साहस ऊर्जा	३७.५६	५०४.८०
युनिक नेपाल लघुवित्त	३६.९०	२,६६१