२०८१ फागुन १४ गते ७:५६ 
१४ फागुन, काठमाडौं । स्पेनिस कोपा डेल रे फुटबलअन्तर्गत सेमिफाइनलको पहिलो लेगको खेलमा बार्सिलोना र एट्लेटिको मड्रिडले रोमाञ्चक बराबरी खेलेका छन् ।
गएराति बार्सिलोनाको मैदानमा भएको खेलमा दुवै टोलीले ४-४ गोलको बराबरी खेलेका हुन् । खेलमा दुई गोलले पछि परेको अवस्थाबाट पुनरागमन गर्दै बार्सिलोनाले अग्रता बनाएपनि अन्तिममा फेरि एट्लेटिकोले बराबरी गरेको हो ।
खेलको पहिलो मिनेटमै जुलियन अल्भारेजले गोल गर्दै एट्लेटिकोलाई अग्रता दिलाएका थिए । छैटौं मिनेटमा एन्टोइन ग्रिजमानले गोल गरेपछि पाहुना टोली २-० ले अघि बढ्यो ।
१९औं मिनेटमा पेड्री तथा २१औं मिनेटमा पाउ कुभार्सीले गोल गरेपछि खेल २-२ को बराबरीमा आयो । ४१औं मिनेटमा इनिगो मार्टिनेजले गोल गरेपछि पहिलो हाफ सकिँदा खेलमा बार्सिलोना अगाडि आयो ।
दोस्रो हाफको ७४औं मिनेटमा रोबर्ट लेवान्डोस्कीले गोल गरेपछि बार्सिलोनाले अग्रता बढायो । तर ८४औं मिनेटमा मार्कस लोरेन्टे र इन्जुरी समयमा एलेक्जेन्डर सोर्लोथले गोल गरेपछि खेल बराबरीमा सकिएको हो ।
प्रतिक्रिया 4