
काठमाडौं । निर्देशक शिव रेग्मीकी भान्जी एकता पौडेलले निर्देशन गर्न लागेको डेब्यु कथानक फिल्म ‘हर्ष’को छायांकन शनिबारदेखि सुरु हुने भएको छ । शिवरात्री अवसरमा बुधबार शुभसाइत पूजा गरियो ।
ठमेलस्थित त्रिदेवी मन्दिरमा शुभमूहूर्त गरियो । यो फिल्ममा खगेन्द्र लामिछाने र वर्षा राउतको शीर्ष भूमिका हुनेछ । सन्तोष पन्त, शर्मिला मल्ल, माओत्से गुरुङ, विशाल पहाडी, निमा पाण्डे, सुवर्ण थापा, सृष्टि महर्जन र संगीता नापित अभिनय हुनेछ ।
निर्देशक पौडेलले अमेरिकाको न्युयोर्क फिल्म एकेडेमीमा फिल्म सिकेर काठमाडौं आएकी हुन् । उनले केही छोटा फिल्म समेत निर्देशन गरेकी छन् ।
पारिवारिक र सामाजिक कथावस्तुमा फिल्म बन्न लागेको हो । आलोक शुक्लाले फिल्म खिच्नेछन् भने संगीत वसन्त सापकोटा र एलिस कार्कीको हुनेछ । दृश्य सम्पादकमा लोकेश बज्राचार्य र नृत्य निर्देशनमा सुनिल क्षेत्री हुनेछन् ।
कुलदीप शर्मा मुख्य सहायक निर्देशक र ईश्वर घिमिरे निर्माण नियन्त्रक रहेको फिल्मलाई ई-प्राइम मुभिज र अष्टलक्ष्मी प्रोडक्सन ब्यानरमा बनाउन लागिएको हो । प्रसन्न पौडेल र विकास पौडेल निर्माता हुन् । कार्यकारी निर्मातामा हिक्मत चोखल छन् । २०८२ सालभित्र प्रदर्शन लक्ष्य राखिएको छ ।
प्रतिक्रिया 4