एन्जिला भन्छिन्- खेलाडीहरूको फिल्म बन्न बाटो खुलेको छ

काठमाडौं । राष्ट्रिय महिला फुटबल टोलीकी कप्तान तथा गोलकिपर एन्जिला तुम्बापो सुब्बाले आफ्नो मात्र नभएर अन्य खेलाडीको फिल्म पनि बन्नुपर्छ भन्ने बाटो खुलेको बताएकी छिन् ।

आफ्नो जीवनबारेको फिल्म ‘अञ्जिला’को ट्रेलर सार्वजनिक गर्न आयोजित पत्रकार सम्मेलनमा उनले संघर्ष गरेर सफलता प्राप्त गर्ने खेलाडी धेरै रहेको र अरुको बारेमा पनि फिल्म बन्नुपर्ने बताइन् ।

कार्यक्रममा एन्जिलाले आफूले बिर्सन नहुने धेरै नाम रहेको र त्यसमा निर्देशक मिलन चाम्स थपिएको बताइन् । ‘म मिलन दाइलाई पनि जिन्दगीभर भुल्दिनँ । पहिले म डराउँथेँ तर आजकल आफ्नै दाइ हो जस्तो लाग्छ । मेरो कथा उहाँहरूकै जिम्मामा छोडेर जाँदैछु । हृयदेखि नै आभारी छु ।’

उनले अघि भनिन्, ‘मैले सोचेको पनि थिइनँ कि मैले दयाहाङ राईसँग फिल्म खेल्छु भनेर । उहाँले जस्तोसुकै ब्यस्त समयमा पनि खेल प्रसारण हुँदा पनि हेर्नुहुन्थ्यो र खेलप्रति समर्पित हुनुहुन्थ्यो ।’

यो पनि पढ्नुहोस

एन्जिला तुम्बापो सुब्बा अभिनित फिल्म ‘अञ्जिला’को ट्रेलर सार्वजनिक

आफू काठमाडौं आएदेखि गडफादर बनेर बाटो देखाउन निर्माता प्रेमकुमार श्रेष्ठलाई धन्यवाद दिँदै उनले भनिन्, ‘म आज जुन बाटोमा छु उहाँले गर्दा नै छु । मेरो मात्र नभएर अन्य खेलाडीहरूको फिल्म पनि बन्नुपर्छ भन्ने बाटो खुलेको छ ।’

एन्जिलाले आफू १३ वर्ष हुँदा पनि मैले ६० किलोको चामलको भारी बोक्ने गरेको बताउँदै छायाङ्कनमा खासै अप्ठ्यारो नलागेको जनाइन् । फिल्मका निर्माता समेत रहेका कलाकार श्रेष्ठले यो फिल्ममा फुटबलभन्दा पनि अञ्जिलाको कथा मुख्य रहेको बताए ।

अभिनेता दयाहाङ राईले आफू हरेक नेपाली खेलको प्रशंसक र दर्शक रहेको बताउँदै महिला फुटबल टोलीको आफू ठूलो फ्यान रहेको बताए । ‘कप्तानको फिल्म बन्दैछ भनेपछि भूमिका के हो समेत थाहा नपाई काम गर्न सहमत भएँ । यसको लागि म जिन्दगीभर ऋणी हुनेछु’ राईले भने ।

निर्देशक चाम्सले फिल्ममा अधिकांश राष्ट्रिय खेलाडीले अभिनय गरेको बताए । चाम्सले गैरकलाकारलाई अभिनय गराउनु अत्यन्त कठिन रहेको जनाउँदै अभिनेता राईलाई दुई वर्ष पर्खेर अभिनय गराएको बताए । चाम्सले चलचित्र हेर्न आउनुअघि दर्शकले धेरै कुरा जानेर आउनुपर्छ भन्ने लागेर ट्रेलरमा केही कुराहरू खुलासा गरिएको जनाए ।

फिल्म ‘अन्जिला’ले खेलाडीको रुपमा जन्मथलोदेखि काठमाडौंसम्म खेलाडी बन्ने सपना पुरा गर्न एन्जिलाले गरेको संघर्षको कथा पेश गर्छ । फिल्म ‘अञ्जिला’ फागुन २९ गतेदेखि प्रदर्शन तयारीमा छ ।