नयाँ कम्पनीमा काम सुरु गरेको पहिलो १० दिन, के गर्ने र के नगर्ने ?

कुनै पनि नयाँ काममा जोडिँदा आफूलाई प्रमाणित गर्ने ठूलो दबाब हुन्छ । कसैले पनि नयाँ ठाउँमा काम गर्न जाँदा त्यहाँको हाकिम र नयाँ सहकर्मीलाई यो कामका लागि म सबैभन्दा योग्य छु भनेर देखाउन चाहन्छौँ । तर यस प्रक्रियामा हामीले केही गल्ती पनि गर्न सक्छौँ जसले गर्दा योग्य भन्दा पनि अयोग्य देखिन सक्छौँ ।

जागिरको सुरुवाती दिनमा के नगर्ने ?

आफूलाई सर्वज्ञ नठान्ने

कामको सुरुवाती दिनमा वरपरका मानिसहरूलाई बुझ्ने र नयाँ कामको मूल्याङ्कन गर्ने हो । त्यसैले प्रारम्भिक भेटघाटमा कम बोल्ने र धेरै मुस्कुराउने गर्नुपर्छ । सबै थाहा छ भनेको जस्तो देखाउन हुँदैन । सहकर्मीहरूले नयाँ साथीको बानी व्यवहारलाई याद गरिरहेका हुन्छन् । ठूला कुरा गर्ने मानिसलाई कसैले मन पराउँदैनन् ।

यसबाहेक नयाँ जागिरमा कम्पनीको कामकाजमा आउन सक्ने व्यावहारिक समस्याबारे पनि नयाँ व्यक्तिलाई जानकारी हुँदैन । त्यसैले प्रारम्भिक दिनहरूमा, कम्पनीलाई पूर्णरूपमा परिवर्तन गर्ने ठूला योजनाहरू प्रस्तुत गर्नु हुँदैन । साथै, कम्पनीमा काम गर्ने शैलीको आलोचना गर्नुहुँदैन ।

जबसम्म तपाईँको विचारलाई कम्पनीले गम्भीरतापूर्वक लिँदैन त्यो बेला सम्म आलोचना नगर्नु नै राम्रो हुन्छ । सहकर्मीहरूले यी सबै आलोचनाहरू मन नपराउन सक्छन् ।

ठूला दाबी नगर्ने

धेरै मानिसहरुको नयाँ काममा ठूला दाबी गर्ने बानी हुन्छ । यी दाबीहरू पछि पूरा नहुन सक्छन् र त्यसपछि जवाफ दिन गाह्रो हुन्छ । प्रारम्भिक दिनहरूमा ठूला दाबीहरू गर्नबाट आफूलाई रोक्न धेरै गाह्रो हुन्छ, तर आफूलाई नियन्त्रण गर्नुपर्छ ।

केही दिन ठूला लक्ष्यको कुरा नगर्नु नै फाइदाजनक हुन्छ । पहिले सजिलो लक्ष्यहरू सेट गर्नुपर्छ । त्यसपछि तिनीहरूलाई प्राप्त गरेर सबैको नजरमा आफ्नो लागि ठाउँ बनाउनुपर्छ । जिम्मेवारीपूर्वक काम गर्ने र राम्रो सम्बन्ध विकास गर्नतिर ध्यान केन्द्रित गर्नुपर्छ ।

के गर्ने ?

कम्पनीमा आफ्नो स्थिति अनुमान गर्ने

कामको पहिलो दश दिनमा कम्पनीका प्रभावशाली व्यक्तिहरू को हुन् र आफ्नो हैसियत के छ भन्ने बुझ्ने प्रयास गर्नु राम्रो हुन्छ । यसपछि मात्र आफ्नो बारेमा कुराहरू खोल्न सुरु गर्नुपर्छ ।

सम्बन्धहरू निर्माण गर्ने

कम्पनीका वरिष्ठ व्यक्तिहरूसँग सम्पर्क राख्नुपर्छ । जसले सही सल्लाह दिन सक्छन् र काममा सहयोग पनि गर्न सक्छन् । कुनै पनि कुरामा दुबिधा छ भने आफूभन्दा वरिष्ठ व्यक्तिलाई सोध्नुपर्छ, नजानेको कुरा सोध्न डराउनु हुँदैन ।

प्रश्नहरू यस्तो हुनुपर्छ कि तपाईँले उनीहरूको मार्गदर्शन चाहनुहुन्छ जस्तो लागोस् । कम्पनीको प्रबन्धक र सहकर्मीहरूसँग सम्बन्ध विकास गर्ने सबैभन्दा राम्रो तरिका अरूबाट सल्लाह लिनु हो ।

वरिष्ठ र प्रबन्धकहरूले निरन्तर तपाईँको मूल्याङ्कन गरिरहेका हुन्छन् । त्यसैले कुन बेला कुरा गर्ने र कुन बेला प्रश्नहरू सोध्ने अनि कति बेला अरूको कुरा सुन्नमा ध्यान केन्द्रित गर्ने भन्ने कुरा जान्नु महत्त्वपूर्ण हुन्छ ।

सरल लक्ष्यहरू बनाउने र तिनीहरूलाई प्राप्त लाग्ने

कम्पनीको कार्य प्रणाली राम्ररी जान्ने, कम्पनीका प्रबन्धक, कार्यकारीलाई चिन्ने र कम्पनीमा आफ्नो भूमिका बुझ्न, त्यस्ता लक्ष्यहरू पहिलो दस दिनको लागि पर्याप्त हुन्छ । यी कुरामा ध्यान दिएर लक्ष्य प्राप्त गर्न सजिलो हुन्छ । साथै तिनीहरूले प्रमाणित पनि गर्नेछ कि तपाईँ कम्पनीको हरेक कुरामा चासो लिइरहनु भएको छ ।

कामको सुरुवातमा, सबैभन्दा महत्त्वपूर्ण कुरा भनेको कम्पनीले तपाईँबाट के अपेक्षा गर्दछ र तपाईँको भूमिका के हो भनेर बुझ्नु हो । कुनै पनि कुरामा घमन्ड गर्नु भनेको कम्पनीमा आफ्नो छविलाई बिगार्नु हो । त्यसैले कुनै पनि कुरामा घमन्ड नगरी कम्पनीको माहौललाई बुझ्नुपर्छ ।