१७ फागुन, काठमाडौं । आयोजकको टोली केपी एफसीलाई हराउँदै मच्छिन्द्र एफसी जारी केपी ओली कप फुटबल प्रतियोगिताको फाइनलमा प्रवेश गरेको छ ।
दशरथ रंगशालामा शनिबार भएको दोस्रो सेमिफाइनलमा आयोजक टोलीलाई ४–० को गोलले पराजित गर्दै मच्छिन्द्रले लगातार तेस्रोपटक फाइनल यात्रा तय गरेको हो । मच्छिन्द्रका लागि स्टेफेन जमालाले दुई तथा मनिष डाँगी र रोशन रानाले एक-एक गोल गरे ।
खेलको ३८औं मिनेटमा मच्छिन्द्रका मनिषले गोल गर्दै टोलीलाई पहिलो अग्रता दिलाएका थिए । ४९औं मिनेटमा रोशनले गोल गर्दै मच्छिन्द्रको अग्रतालाई दोब्बर बनाए ।
खेलको ८६औं मिनेटमा पाएको पेनाल्टीमा गोल गर्दै मच्छिन्द्रका स्टेफेनले टोलीलाई तेब्बर अग्रतामा पुर्याए । पुनः ९०औं मिनेटमा स्टेफेनले व्यक्तिगत दोस्रो गोल गर्दै अग्रता ४–० मा पुर्याए ।
अब मच्छिन्द्रले उपाधिका लागि त्रिभुवन आर्मी क्लबसँग प्रतिस्पर्धा गर्नेछ । आर्मीले पहिलो सेमिफाइनलमा संकटा क्लबलाई २–१ ले हराउँदै फाइनलमा स्थान सुरक्षित गरेको थियो । फाइनल खेल सोमबार हुनेछ ।
प्रतियोगिताको विजेता टोलीले १५ लाख ११ हजार १११ र उपविजेता हुने टोलीले ५ लाख रुपैयाँ पाउनेछन् । प्रतियोगिताको सर्वोत्कृष्ट खेलाडीले एक लाख, उत्कृष्ट गोलकिपर, सर्वाधिक गोलकर्ता र उदीयमान खेलाडीले समान ५० हजार रुपैयाँ पाउनेछन् ।
फाइनल खेल अवलोकन गर्न इटालीलाई विश्वकप जिताएका गोलकिपर जियानलुजी बुफोन पनि नेपाल आउँदै छन् ।
प्रतिक्रिया 4