एमाले मोरङ अधिवेशनमा नाराबाजी, बन्दसत्र रोकियो

१८ फागुन, विराटनगर । जिल्ला अधिवेशन प्रतिनिधि मनोनित गरेको विषयमा विवाद भएपछि नेकपा एमाले मोरङ जिल्ला अधिवेशनको बन्दसत्र रोकिएको छ । जिल्ला कमिटीले मनोनित गरेको ४६ जना प्रतिनिधिको विषयमा विवाद भएपछि बन्दसत्र तत्कालका लागि रोकिएको हो ।

एमाले मोरङमा संस्थापन र इतर पक्ष गरी दुई वटा समूह छ । इतर पक्षले प्रतिनिधि छनोट गर्दा संस्थापन पक्षले मनोमानी गरेको भन्दै बन्दसत्रमा नाराबाजी गर्‍यो । नाराबाजीका कारण अवस्था असहज बनेपछि बन्दसत्र रोकेर नेताहरु छलफलमा बसेका हुन् । छलफलको सहजीकरण केन्द्रीय उपाध्यक्ष गुरु बरालले गरिरहेका छन् ।

‘जिल्लाको संगठन कमिटीले मनोनित गर्ने प्रतिनिधिको विषयमा कमिटी भित्रैबाट विरोध भएपछि नाराबाजी भयो, एकलैटी रुपमा प्रतिनिधि मनोनित गर्ने निर्णय खारेज गर्नुपर्ने माग छ,’ इतरपक्षका एक प्रतिनिधिले भने, ‘छलफल गर्ने भन्दै नेताहरु बस्नु भएको छ, बन्दसत्र केहीसमयलाई स्थगित भएको छ ।’

इतर पक्षका नेताहरुका अनुसार बन्दसत्रमा उपसचिव सोमराज थापाले मनोनित प्रतिनिधिका विषयमा छलफल नभएको भन्दै असहमति जनाएका थिए । त्यसपछि एकलौटी गरेको भन्दै नाराबाजी सुरु भएको थियो । मनोनित प्रतिनिधिका विषयमा थप छलफल गर्ने भन्दै नेताहरु बसेपछि नाराबाजी रोकिएको छ ।

बन्दसत्रमा जिल्ला अध्यक्षको प्रतिवेदन जिल्ला कमिटीमा पेश नगरेको र विराटनगर महानगर कमिटीका पूर्वअध्यक्ष सागर थापालाई कारवाही गरेको विषयमा पनि विवाद भएको थियो । ‘विरोध हुँदै बन्दसत्र चल्दै थियो तर पछिल्लो समय मनोनित प्रतिनिधिको विषयमा नाराबाजी भयो,’ एमालेका अर्का प्रतिनिधिले भने, ‘५ प्रतिशत मनोनित गरेको विषयमा अधिकांशले असहमति जनाए ।’

नाराबाजीका कारण जिल्ला अधिवेशनको कार्यतालिका प्रभावित भएको छ । पूर्वनिर्धारित कार्यतालिका अनुसार आज बेलुकाबाट निर्वाचन कार्यतालिका सार्वजनिक गरेर मनोनयन प्रक्रिया अघि बढाउने तयारी थियो । तर बन्दसत्र सकिएको छैन ।

जिल्ला अधिवेशनमा संस्थापन र इतर पक्षको नाममा दुई वटा प्यानल बनाएका छन् । संस्थापन पक्षमा अध्यक्ष केपी शर्मा ओली निकट नेताहरु छन् । इतर पक्षको नेतृत्व विनोद ढकालले गरेका छन् ।

संस्थापन पक्षले राजकुमार ओझालाई जिल्ला अध्यक्षमा अघि सार्ने तयारी गरेको छ । विनोद ढकालको समूहले अजम्बर राईलाई जिल्ला अध्यक्षको रुपमा अघि बढाउने तयारी गरेको छ । यो समूहले उपाध्यक्षमा सागर थापालाई अघि सार्ने तयारी गरेको छ । ढकालको समूहले सचिवमा सोमराज थापालाई अघि सार्ने तयारी गरेको छ । यो समूहबाट उपसचिवमा उषा झा र सन्तोष वान्तवालाई अघि बढाउने तयारी रहेको ढकालनिकट नेताहरूले बताए ।

संस्थापन पक्षले उपाध्यक्षमा शान्ति भुजेललाई उम्मेवार बनाउने तयारी गरेको छ । यो समूहबाट रविन थापा सचिवको उम्मेदवार बन्ने छन् । अधिवेशनले १ सय ६५ सदस्यीय नयाँ नेतृत्व चयन गर्नेछ । जिल्ला अधिवेशनका लागि ९ सय १४ जना प्रतिनिधि छानिएका छन् ।