२०८१ फागुन १९ गते १७:४१ 
१९ फागुन, काठमाडौं । यही मार्च २२ गतेदेखि सुरु हुने इन्डियन प्रिमियर लिग (आईपीएल) क्रिकेटका लागि साविक विजेता कोलकाता नाइट राइडर्सले कप्तानको घोषणा गरेको छ ।
कोलकाताको कप्तानमा अजिन्क्या रहाने नियुक्त भएका हुन् । सोमबार रहानेलाई कप्तान नियुक्त गरिएको हो । त्यस्तै टोलीको उपकप्तानमा भेनकटेश अय्यर छन् ।
यसअघि कप्तान रहेका श्रेयस अय्यरलाई टोलीले रिलिज गरेसँगै अक्सनमा पञ्जाब किङ्सले दोस्रो सर्वाधिक महंगो मूल्य (२६ करोड ७५ लाख)मा किनेको थियो । श्रेयस पञ्जाबको कप्तान नियुक्त भइसकेका छन् ।
कप्तानको रूपमा नियुक्त भएपछि रहानेले सफल टोलीको कप्तानी गर्न पाउँदा उत्साहित रहेको बताए । हालको टिम सन्तुलित भएको भन्दै उनले सफलता दिलाउन सक्ने प्रतिबद्धता व्यक्त गरे ।
गत सिजन चेन्नई सुपर किङ्समा रहेका उनी यसपटक अक्सनको पहिलो चरणमा कुनैपनि टिमको रोजाइमा परेका थिएनन् । दोस्रो चरणको एक्सेलेरेटेड अक्सनमा उनलाई १ करोड ५० लाखमा कोलकाताले लिएको थियो ।
कोलकाताले उद्घाटन खेलमै मार्च २२ मा रोयल च्यालेन्जर्स बेंगलुरुसँग खेल्ने छ । गत संस्करणको फाइनलमा कोलकाताले सनराइजर्स हैदराबादलाई हराएर उपाधि जितेको थियो ।
प्रतिक्रिया 4