२०८१ फागुन १९ गते २०:०४ 
१९ फागुन, काठमाडौं । मछिन्द्र एफसीले केपी ओली कप फुटबलको उपाधिमा ह्याट्रिक गरेको छ । सोमबार भएको तेस्रो संस्करणको फाइनलमा त्रिभुवन आर्मी क्लबलाई २-० ले हराउँदै मछिन्द्रले दबदबा कायमै राखेको हो ।
मछिन्द्रको जितमा स्टेफेन जमाह जालेले १ गोल गर्दा एक गोल आत्मघाती भएको थियो । २९औं मिनेटमा मछिन्द्रको क्रस क्लियर गर्ने क्रममा बिमल पाण्डेबाट आत्मघाती गोल हुँदा मछिन्द्रले अग्रता लिएको थियो ।
दोस्रो हाफमा युसुफ मलिकको क्रसमा जमहा जालेले उत्कृष्ट फर्स्ट टच फिनिस गर्दै मछिन्द्रको अग्रता दोब्बर पारे । त्यसपछि थप गोल भएनन् र मछिन्द्रले फेरि पनि उपाधि रक्षा गर्न सफल भयो ।
नेपाली घरेलु प्रतियोगितामा एउटै टोलीले लगातार तीनपटक एकै प्रतियोगिताको उपाधि जित्नु कमै देखिने दृश्य हो । मछिन्द्रले उत्कृष्ट लय कायमै राख्दै उपाधि रक्षा गर्न सफल भयो । समग्रमा भन्नुपर्दा केपी ओली कप मछिन्द्रका लागि भाग्यमानी साबित भइरहेको छ ।
यसअघिका दुवै संस्करणमा टाइब्रेकरसम्म पुग्नुपरेको मछिन्द्रले यसपटक भने निर्धारित समयमै पर्याप्त गोल गर्दै उपाधि फेरि आफ्नो नाममा गर्यो ।
पहिलो संस्करणको फाइनलमा सातदोबाटो युथ क्लब तथा दोस्रो संस्करणको फाइनलमा एनआरटी क्लबलाई टाइब्रेकरमा हराएर मछिन्द्रले उपाधि जितेको थियो ।
यो सिजन मछिन्द्रको यो दोस्रो उपाधि हो । यसअघि इटहरी गोल्डकपको उपाधि जितेको थियो ।
प्रतिक्रिया 4