टिचिङ अस्पतालमा पानी आपूर्ति ठप्प, मर्कामा बिरामी

२० फागुन, काठमाडौं । त्रिभुवन विश्वविद्यालय शिक्षण अस्पताल (टिचिङ अस्पताल)मा २४ घण्टादेखि पानी आपूर्ति बन्द हुँदा अवस्था नाजुक बनेको छ ।

पानी अभावमा बिरामी, बिरामीका कुरुवा, कर्मचारी, डाक्टर तथा नर्सहरु आजित भएका छन् ।

अस्पताल प्रशासक सरस्वती गुरुङका अनुसार अस्पताल परिसरको बोरिङले पानी तानेको छैन र खानेपानीको पाइपबाट पनि नियमित आपूर्ति भएको छैन । त्यसैले पानीको अभाव भएको उनले बताइन् । ‘पानीको समस्या समाधानका लागि छलफल भइरहेको छ,’ उनले भनिन् ।

अस्पतालका एक कर्मचारीले पानी अभावमा सरसफाइ प्रभावित भएको बताए । उपचार सेवा समेत प्रभावित हुने स्थितिमा पुगेको बताउँदै उनले भने, ‘अप्रेसन समेत रोकिएलाजस्तो भइसक्यो ।’

त्रिवि शिक्षण अस्पतालमा केयूकेएलको महाराजगञ्ज शाखाले पानी आपूर्ति गर्दछ । अरु घर धनीलाई आधा इन्चको पाइपबाट पानी दिने गरिए पनि त्रिवि शिक्षण अस्पताललाई भने दुई इञ्चसम्मको पाइपबाट पानी दिने गरिएको केयूकेएल स्रोत बताउँछ । पानी आपूर्तिको तालिका भने समान हुने गर्दछ ।

केयूकेएल स्रोतले भन्यो, ‘अस्पतालमा पानी आपूर्ति बन्द भएको थाहा पाएपछि गएको रातभरि पानी पठाइएको छ । थप आवश्यक परे ट्याङ्करबाट पनि पठाउने छौँ । अझै पनि केही समस्या रहेछ भने समाधानको तत्काल पहल गर्छौं ।’