
२० फागुन, विराटनगर । नेकपा (एमाले)मोरङको विराटनगरमा जारी १० औं जिल्ला अधिवेशनमा नयाँ नेतृत्वका लागि हुने निर्वाचन फेरि एक दिन सरेको छ ।
पूर्वनिर्धारित कार्यसूची अनुसार सोमबार निर्वाचन गर्ने कार्यसूची थियो । तर बन्दसत्रमा विवाद भएपछि मंगलबार बिहानका लागि समय सारिएको थियो । सहमतिको प्रयास गर्ने भन्दै मंगलबार बिहानबाट दिउँसोका लागि समय तोकियो ।
निर्वाचन समितिले मंगलबार निर्वाचन गर्न समय पुग्ने भन्दै बुधबार बिहानका लागि मतदानको समय सारेको हो ।
प्रमुख निर्वाचन अधिकृत सुरेशलाल श्रेष्ठका अनुसार बुधबार बिहान ७ बजेदेखि मतदान गर्ने गरी तयारी गरिएको छ । उनका अनुसार १६५ सदस्यीय जिल्ला कमिटीका लागि ३२५ जनाले उम्मेदवारी दर्ता गरेका थिए ।
मंगलबार सहमतिको प्रयास गर्दा ६३ जनाले मनोनयन फिर्ता लिएका छन् । निर्वाचन समितिका अनुसार ७१ जना सदस्य सर्वसम्मत भएका छन् । चुनावी मैदानमा १९१ जना छन् ।
भोलि मतदानमा एकै पटकमा २० जनाले मतदान गर्नसक्ने व्यवस्था मिलाइएको छ ।
उम्मेदवार धेरै भएका कारण एकजना मतदातालाई भोट हाल्न १५ मिनेटसम्म समय लाग्नेछ । मतदानपछि पार्टी कार्यालय पाञ्चालीमा मतगणना हुनेछ ।
अधिवेशनमा संस्थापन पक्षबाट अध्यक्षमा राजकुमार ओझा, उपाध्यक्षमा शान्ति लिम्बू भुजेल, सचिवमा रविन थापा, उपसचिवमा शिल्पा निराला कार्की र ईर्जालाल राजवंशीको उम्मेदवारी परेको छ ।
इतर पक्षबाट अध्यक्षमा अजम्बर राई, उपाध्यक्षमा सागर थापा, सचिवमा सोमराज थापा, उपसचिवमा सन्तोष वान्तवा र उषा झाले उम्मेदवारी दिएका छन् ।
इतर पक्षको नेतृत्व नेता विनोद ढकालले गरिरहेका छन् । उनी पूर्वराष्ट्रपति विद्यादेवी भण्डारी निकट छन् । जिल्लामा आफूलाई संस्थापन बताउने समूहको नेतृत्व एमाले उपाध्यक्ष गुरु बरालले गरिरहेका छन् ।
यो समूहमा प्रदेश इञ्चार्ज शेरधन राई, हिक्मतकुमार कार्की, भानुभक्त ढकाल, मोरङ इञ्चार्ज जीवन घिमिरे छन् । अधिवेशनका लागि ९ सय ११ जना प्रतिनिधि छन् ।
प्रतिक्रिया 4