२०८१ फागुन २१ गते ७:३० 
२१ फागुन, काठमाडौं । आईसीसी च्याम्पियन्स ट्रफी क्रिकेटको दोस्रो सेमिफाइनल खेल आज हुँदै छ । फाइनल प्रवेशका लागि दक्षिण अफ्रिका र न्युजिल्याण्ड खेल्दै छन् ।
पाकिस्तानको लाहोरस्थित गद्दाफी स्टेडियममा हुने खेल दिउँसो पौने ३ बजेदेखि सुरु हुनेछ । यस खेलको विजेताले उपाधिका लागि भारतसँग दुबईमा खेल्नेछ ।
दक्षिण अफ्रिका समूह बी को विजेता तथा न्युजिल्याण्ड समूह ए को उपविजेताका रूपमा सेमिफाइनल खेल्न लागेका हुन् । दक्षिण अफ्रिका यस प्रतियोगितामा हालसम्म अपराजित छ भने न्युजिल्याण्ड भारतसँग पराजित भएको थियो ।
दक्षिण अफ्रिकाले समूह चरणमा अफगानिस्तान र इंग्ल्याण्डलाई हराएको थियो भने अस्ट्रेलियासँगको खेल वर्षाले नतिजाविहीन भएको थियो ।
न्युजिल्याण्डले समूह चरणमा बंगलादेश र पाकिस्तानलाई हराउँदा भारतसँग पराजित भएको थियो । दक्षिण अफ्रिकालाई हराए न्युजिल्याण्डको भेट भारतसँग दोस्रोपटक हुनेछ ।
यसअघि मंगलबार भएको पहिलो सेमिफाइनलमा अस्ट्रेलियालाई हराउँदै भारत फाइनलमा प्रवेश गरिसकेको छ ।
प्रतिक्रिया 4