७ प्रदेशका शिक्षकलाई नसर्ने रोग सम्बन्धी तालिम

२१ फागुन, काठमाडौं । भास्कर-तेजश्री स्मृति प्रतिष्ठानले नसर्ने रोग र लैङ्गिक असमानता तथा यौन दुर्व्यवहार रोकथाम सम्बन्धी प्रशिक्षक तालिम सञ्चालन गरेको छ। शिक्षा तथा मानव स्रोत विकास केन्द्रसँगको साझेदारीमा भक्तपुरमा तालिम सञ्चालन गरिएको आयोजकले जानकारी दिएका छन्।

आयोजकका अनुसार फागुन १८ गतेबाट सुरु भएको तालिम २२ गतेसम्म सञ्चालन हुनेछ । प्रशिक्षक प्रशिक्षण कार्यक्रममा सातै प्रदेशबाट तीन-तीन जना प्रशिक्षक तथा रोस्टर प्रशिक्षक सहभागी छन् ।

कार्यक्रममा बोल्दै शिक्षा तथा मानव स्रोत विकास केन्द्रका महानिर्देशक कृष्णप्रसाद काप्रीले रोग नै लाग्न नदिन सचेतना जगाउने सशक्त माध्यम बालबालिका तथा विद्यालय

भएको बताए । कुनै पनि कुरा समाजमा पुर्‍याउने मेरूदण्ड भनेको विद्यालय र बालबालिका नै भएको हुँदा नसर्ने रोग, लैङ्गिक असमानता तथा यौन दुर्व्यवहार रोकथाम सम्बन्धी जनचेतना जगाउन विद्यालय नै रोजेको र शिक्षकलाई नै यसको प्रशिक्षक बनाउन तालिम दिएकोमा आयोजकलाई धन्यवाद दिए ।

सिकेका कुरालाई व्यवहारमा कार्यान्वयन गर्न उनले प्रशिक्षक शिक्षकहरूलाई आग्रह गरे ।

भाष्कर-तेजश्री स्मृति प्रतिष्ठानका संस्थापक अध्यक्ष प्रा.डा. रीता थापाले समाजलाई स्वस्थ राख्न र समतामूलक एवं दुर्व्यवहारमुक्त समाज निर्माण गर्न पहल गर्नु नै फाउण्डेसनको उद्देश्य रहेको बताइन् । थापाले समाजमा दुर्व्यवहार गर्ने ८९ प्रतिशत आफैँले चिनेका व्यक्ति हुने भएको हुँदा नवयुवालाई सशक्तीकरण गर्नु नै यसको न्यूनिकरण एवं रोकथाम भएको उनको भनाइ छ।

यो पनि पढ्नुहोस

स्कुले केटा-केटीसँग रमाइरहेकी जनस्वास्थ्यविद्

स्वास्थ्य तथा जनस‌ख्या मन्त्रालयकी अतिरक्त सचिव डा. सङ्गीता मिश्राले स्वास्थ्य र शिक्षाको सम्बन्ध अत्यन्त पारस्परिक हुने भएको हुँदा शिक्षाको माध्यमबाट नै नसर्ने रोग र लैङ्गिक असमानता तथा यौन दुर्व्यवहार रोकथाम सम्बन्धी सचेतना कार्यक्रम गर्नु महत्वपूर्ण भएको बताइन् । उनले बालबालिकाको संवेदनशीलतालाई बुझिदिन शिक्षक, प्रशिक्षकलाई आग्रह समेत गरिन् ।

बालिकाले एक-अर्कासँग सम्बन्धित नभएका ८/१० थरिका कम्प्लेनहरू गरे भने त्यहाँ यौन दुर्व्यवहार भएको बुझ्नुपर्ने उनले बताइन् । कुनै पनि ठाउँमा महिलाहरूको सङ्ख्यात्मक सहभागी मात्रै नभई गुणात्मक सहभागी हुनुपर्ने डा. मिश्रको भनाइ थियो ।

चिकित्सा शास्त्र अध्ययन संस्थानका पूर्व डिन प्रा.डा. जगदीशप्रसाद अग्रवालले ७४ प्रतिशत मान्छे नसर्ने रोगका कारण मरिरहेको जानकारी दिए । नसर्ने रोगबाट बच्ने उपाय भनेको खनपान र जीवनशैली नै भएको उनले बताए ।

नसर्ने रोग र लैङ्गिक असमानता तथा यौन दुर्व्यवहार रोकथाम सम्बन्धी सचेतना कार्यक्रम विद्यालय तहबाटै अभिभावकसमक्ष पुर्‍याउन सकिन्छ भनेर भाष्कर-तेजश्री स्मृति प्रतिष्ठानसँग एमओयु गरिएको शिक्षा तथा मानव स्रोत विकास केन्द्रका उपमहानिर्देशक चन्द्रकान्त भुसालले बताए ।

शिक्षकलाई प्रशिक्षित गरी समाजलाई राम्रो प्रभाव पार्न सकिन्छ भनेर एमओयु गरिएको उनको भनाइ थियो ।

विश्व स्वास्थ्य सङ्गठन नेपालका प्रमुख डा. संभाजी राव पाण्डवले नसर्ने रोगबाट बच्ने र बचाउने भनेको जागरण एवं सशक्तीकरण नै रहेको बताए । विद्यालय तहबाट नै जीवनशैलीप्रति बालबालिकालाई सचेत र शक्तीकरण गराउन सकेमा नसर्ने रोगको मृत्युदर घट्न सक्ने उनको भनाइ थियो ।