क्लिनजिङ् र फेसियलमा के छ फरक ?

अनुहारको छाला चम्किलो र स्वस्थ होस् भन्ने चाहना सबैको हुन्छ । तर यसका लागि खानपान र छालाको हेरचाह दुवैमा ध्यान दिन जरुरी हुन्छ ।

स्वस्थ आहारले छालालाई स्वस्थ राख्न सकिन्छ । साथै छालाको गुणस्तर कायम राख्न हेरचाह गर्नु पनि धेरै महत्त्वपूर्ण हुन्छ । कतिपय मानिसले छालालाई चम्किलो बनाउन क्लिनजिङ गर्छन् भने कतिपयले फेसियल गराउने गर्छन् ।

फेसियल र क्लिनजिङ् दुवै छालाका लागि फाइदाजनक हुन्छ । तर, कहिलेकाहीँ आफ्नो छालाका लागि क्लिनजिङ् वा फेसियल कुन बढी प्रभावकारी हुन्छ ? भन्ने प्रश्न मनमा उठ्न सक्छ ।

छालाको प्रकार, छालाको समस्या र छालाको संवेदनशीलता अनुसार फेसियल वा क्लिनजिङ के गर्ने भनेर छनोट गर्नु राम्रो हुन्छ । क्लिनजिङ् गर्दा अनुहार सफा मात्रै गरिन्छ भने फेसियलमा धेरै बेर मसाज गरिन्छ । जसमा उमेर अनुसारको मसाज पनि हुन्छ । फेसियलले अनुहारको रिन्कल हटाउने, ताजगीपन दिइरहने, अनुहारमा चमक ल्याउने काम गर्छ ।

क्लिनजिङ्

अनुहारको छाला सफा गर्ने एक प्रक्रियालाई नै क्लिनजिङ् भनिन्छ । यस प्रक्रियामार्फत, छालामा रहेको धुलो र फोहोर हटाइन्छ । दैनिक जीवनमा आफ्नो छालाको हेरचाहमा ध्यान दिन नसक्ने र बाहिरी प्रदूषणका कारण छाला धेरै डल भएकाहरूले यो प्रक्रिया अपनाउन सक्छन् ।

क्लिनजिङ्ले अनुहारमा रहेको फोहोरलाई हटाउँछ र छाला चम्किलो देखिन्छ । यसले अनुहारलाई गहिरो गरी सफा गर्छ । अनुहारमा जम्मा भएर बसेको धुवाँ, धुलो र फोहोर हटाउन यो धेरै उपयोगी हुन्छ । १५ दिनमा एक पटक क्लिन्जिङ् गर्दा यसले राम्रो परिणाम दिन्छ । पार्लर जान नभ्याएको खण्डमा घरमै क्लिनजिङ् क्रिम लगेर आफैँले पनि सफा गर्न सकिन्छ ।

फेसियल

यदि अनुहारको सौन्दर्य राम्रो छ तर त्यसमा थप ऊर्जा दिने निखार ल्याउन मन छ भने फेसियल गर्न सकिन्छ । अनुहारको छालामा कुनै रोग लागेर अनुहार बिग्रेको खण्डमा उपचार गर्ने विधि पनि हो फेसियल ।

सही तरिका, सही प्रोडक्ट, सही उपकरणको प्रयोग गरी गरिएको फसियलले सुन्दरतामा वृद्धि गर्दछ । फेसियल एउटा सौन्दर्य सुरक्षाका लागि गरिने साधारण ट्रिटमेन्ट हो ।

फेसियलले मृत कोशिकाहरू हटाएर अनुहारलाई चम्किलो र तरो ताजा राख्न मदत गर्छ । धुलो, धुवाँका कारण छाला रुखो र सुख्खा भएर अनुहारको प्राकृतिक चमक हराएर जान्छ । साथै अनुहारमा दाग, धब्बा, ब्ल्याक हेड, चाउरीपन, डार्क सर्कल देखिन्छ । यस्तोमा फेसियलले छालाको गहिराइबाट सफा गर्ने र मृत कोशिका हटाएर छालालाई निखार्ने काम गर्छ ।

फेसियल लामो प्रक्रिया हो, त्यसैले यसले शरीर र अनुहारको रक्तसञ्चारमा सुधार ल्याउँछ । यसले छालामा प्राकृतिक चमक पनि दिन्छ । महिनाको एक पटक फेसियल गराउनु उपयुक्त हुन्छ । फेसियल गर्दा गुणस्तरीय फेसियल कीटको प्रयोग गर्नुपर्छ ।

दैनिक रुपमा घरमै छालाको हेरचाह गर्ने उपाय

दिनहुँ अनुहारको क्लिन्जिङ् गर्नुपर्छ । यसका लागि गुणस्तरीय क्रिम प्रयोग गर्नुपर्छ । काँचो दूधले पनि क्लिन्जिङ् गर्न सकिन्छ । क्लिन्जिङ् गरिसकेपछि छालामा टोनर लगाउन बिर्सनु हुँदैन । भिटामिन ‘सी’ सिरम पनि लगाउन सकिन्छ ।

छालामा टोनर लगाइसकेपछि मोस्चराइजर अनिवार्य लगाउनुपर्छ । मोस्चराइजर आफ्नो छालाको प्रकृतिअनुसार छनोट गर्नुपर्छ ।जाडो होस् वा गर्मी जुनसुकै मौसममा सनस्क्रिन क्रिम लगाउनुपर्छ । सनस्क्रिन एसपिएफ–५० को लगाउनुपर्छ ।