राजावादी सडकमा आउँदैमा गणतन्त्र मासिँदैनः माओवादी केन्द्र

२६ फागुन, काठमाडौं । नेकपा माओवादी केन्द्रले जनताको ठूलो बलिदानबाट प्राप्त गणतन्त्र राजावादीहरू सडकमा आउँदैमा नमासिने निष्कर्ष निकालेको छ । माओवादी अस्तित्वमा रहँदासम्म कसैले गणतन्त्र फाल्न नसक्नेको ठहर छ ।

माओवादी केन्द्रको आज बसेको पदाधिकारी बैठकले राजावादीहरू सडकमा आउँदैमा व्यवस्थामाथि खतरा उत्पन्न नहुने निष्कर्ष निकालेको हो । बैठक भोलि पनि बस्नेछ ।

सरकारको नेतृत्व गरिरहेका कांग्रेस–एमालेको गलत आचरणकै कारण जनतामा असन्तुष्टि बढेको विश्लेषण माओवादीको छ ।

बैठकमा अध्यक्ष पुष्पकमल दाहाल प्रचण्डले माओवादीले रगत बगाएपछि आएको गणतन्त्र राजावादीहरू सडकमा उत्रिँदैमा नमासिने भन्दै समसामयिक राजनीतिमा धारणा राखेका थिए ।

‘यो व्यवस्थाका लागि माओवादीले सबैभन्दा धेरै रगत बगाएको छ । माओवादी अस्तित्वमा रहँदासम्म कसैले यो व्यवस्था मास्न सक्दैन,’ पदाधिकारी बैठकमा अध्यक्षको भनाइ उद्धृत गर्दै प्रमुख स्वकीय सचिव गोविन्द आचार्यले भने, ‘कांग्रेस–एमालेजस्ता संसदवादी दलका गतिविधिका कारण जनतामा निराशा बढेको छ । तर, माओवादी संविधान र यो परिवर्तनको रक्षा गर्न सक्षम छ ।’

बैठकमा उनीहरूले शासन हातमा लिएर राजाले जनअधिकार खोसेपछि पनि कोही राजाले नै न्याय दिन्छन् भन्दै र कोही आधा प्रतिगमन सच्चियो भन्दै, सरकारमा गएकै हुन् भन्दै कांग्रेस–एमालेबाटै संविधानमा खतरा रहेको बताएका थिए ।

पहिलो र दोस्रो दलको सरकार बनाएर कांग्रेस–एमालेले लोकतान्त्रिक व्यवस्थामा कतै नभएको अभ्यास यहाँ गरेको भन्दै आलोचना गरेका थिए । बैठकले सद्न र सडकको कामलाई प्रभावकारी बनाउने निर्णय पनि गरेको छ ।