घोराहीमा गाउँका सडक विस्तार, स्थानीयलाई हिँड्‌डुल गर्न सजिलो

२६ फागुन, दाङ। दाङको घोराही उपमहानगरपालिका–६ का गाउँबस्तीका सडक विस्तार हुँदा स्थानीयलाई सुविधा भएको छ । चैनपुर– अघरा सडक वर्षौँदेखि ‘ग्राभेल’ मात्र थियो । अहिले पक्की नालासहितको सडक विस्तारले गाउँलेलाई हिँड्डुल गर्न सजिलो भएको हो ।

सो सडकमा पक्की नाला र सडक विस्तार सकिएको छ । घोराही उपमहानगरपालिका–६ अघराका रमा घर्ती घोराही बजार पुग्न आधा घण्टा पैदल हिँडेपछि मात्र गाडी भेट्ने ठाउँमा पुगेका छन्। अहिले गाउँको सडक नालीसहित विस्तार भएपछि घरमै अटोरिक्सा आउने गरेको उनले बताए ।

स्थानीय सरकारले पूर्वाधार विकासमा जोड दिँदै गाउँलाई सडक सञ्जालमार्फत जोड्ने काम तीव्र रुपमा अघि बढाएका कारण सहज भएको उनले बताए । सडक विस्तार भएसँगै गाउँघरको जीवनशैलीमा परिवर्तन आएको उनको भनाइ छ। गाउँघरमा उत्पादन भएका कृषिजन्य उत्पादन सजिलै सहरसम्म पु-याउन सकिने र आम्दानी गर्न सकिने उनले बताए ।

अघरा–जजरागाउँ सडकमा पक्की नाला निर्माण र सडक विस्तार सकिएको छ । सडक सञ्जालको विस्तारले शिक्षा र स्वास्थ्यमा सकारात्मक प्रभाव पारेको स्थानीय चन्द्रीका शर्मा बताउँछन् ।

वर्षामा हिलो र हिउँदमा धुलो उड्ने भएकाले बालबालिकालाई विद्यालय पुग्न असजिलो थियो । हाल सडक बिस्तार भएसँगै सबैलाई सजिलो भएको उनले बताए । गाउँमा सञ्चार, विद्युत्, खानेपानीका धारा घरघरमा पुगेका छन् ।

घोराही उपमहानगरपालिका–६ का अध्यक्ष विष्णुराम आचार्यले वडाभित्र सडक नपुगेका स्थानमा नयाँ ट्रयाक खोल्ने र भएका सडकमा स्तरोन्नति गरिरहेको बताए । स्थानीय सरकारले स्थानीयस्तरमा आवश्यकतालाई प्राथमिकतामा राखेर काम गरेको उनको भनाइ छ ।

त्यसैगरी आव २०७९/८० मा १० किमि र आव २०८०/८१ मा १८ दशमलव ८० किमि सडक कालोपत्रे भएको उपमहानगरपालिकाका प्रमुख नरुलाल चौधरीले जानकारी दिए । उनका अनुसार सात वर्षमा कूल दुई सय १७ दशमलव २५ किमि सडकको ग्राभेल तथा स्तरोन्नति गरिएको छ । त्यसैगरी एक सय ६८ किलोमिटर नयाँ सडकको ट्रयाक खोल्ने काम गरिएको छ ।

उपमहानगरपालिकाले ७ मिटरका सडकहरुमा नालासहित कालोपत्रे गरिरहेको र नालासहित कालोपत्रे गर्दा ढल निकासमा सहयोग पुग्ने चौधरीले बताए ।