‘एक्सन फिल्ममा जस्तो जोश अरु फिल्ममा कहाँ ?’

काठमाडौं । कृषा चौलागाईं निर्देशित दोस्रो निर्देशकीय कथानक ‘पिताम्बर’ प्रदर्शन तयारीमा छ । नेपाली नयाँवर्षको छेकोमा आउने अपेक्षा गरिएको फिल्म एक्सन ड्रामा जनरामा बनेको छ ।

महिलाले एक्सन फिल्म निर्देशन गर्नुलाई नेपाली फिल्मको इतिहासमा दुर्लभ घटना मानिन्छ । यसअघि रक्षासिंह राणाले एक्सन फिल्म ‘द गेम’ र रेखा थापाले ‘हिम्मतवाली’ निर्देशन गरेका थिए ।

कृषा निर्देशित ‘पिताम्बर’ सम्भवतः महिलाले निर्देशन गरेको तेस्रो फिचर हुनुपर्छ । यसअघि ‘एैंचो पैंचो’ निर्देशन गरेकी चौलागाईंको भने यो दोस्रो फिचर हुनेछ जसको परिकल्पना यसअघि नै भएको थियो ।

‘किनकी ‘एैचो पैचो’ पहिलो निर्देशकीय फिल्म भएकाले दर्शक र फिल्मकर्मीबाट कस्तो प्रतिक्रिया पाउँछु भन्ने थियो । यो फिल्म मेरो मनमा बसेको फिल्म थियो । यसलाई सबैले एप्रिसियट गरे’ डेब्यु फिल्मबारे उनले भनिन्, ‘एैचो पैचो’ रिलिज भएपछि मात्र मैले पिताम्बरका लागि विभिन्न लेखकसँग बसेर स्क्रिप्टको डिजाइन गरेंं’ ।

कृषा ‘पिताम्बर’लाई भरपुर एक्सन फिल्म बताउँछिन् । एक्सन फिल्मको निर्माण कम भैरहँदा दर्शकले भिन्न स्वाद पाउने उनको दावी छ ।

‘एक्सन फिल्ममा खर्च र समय धेरै लाग्छ । यस्तो फिल्ममा निर्माताले जोखिम लिन चाहँदैनन्’, कृषा भन्छिन्, ‘यो फिल्म प्रदीप खड्काको लागि पनि नयाँ हो । प्रदीपलाई फरक अवतारमा हेर्न चाहने दर्शकको चाहनालाई पिताम्बरले पुरा गरिदिनेछ । किनकी प्रदीपलाई एक्सन भूमिकामा हेर्ने दर्शकको रहरलाई पिताम्बरले पूर्णता दिन्छ ।’

एक्सनलाई किन प्राथमिकता ? उनको जवाफ छ- यो सबैको चासोको विषय हो । यसको स्क्रिप्ट पुरा गर्न झण्डै एकदेखि डेढवर्ष लगाइन् । ‘लामो समयदेखि फिल्म एउटा विशेष कुरामा मात्र केन्द्रित भइरहेका थिए । कतिपयले स्थानीय कथा देखाउनुपर्छ भन्दै हामी त्यता पनि लागिरहेका थियौं । एउटा यस्तो फिल्म बनाउनुपर्छ, जुन कल्पनाभन्दा पर होस्’ उनले भनिन् ।

अघि भन्छिन्, ‘जसमा मेकर स्वतन्त्र होस् । म यस्तै फिल्म बनाउन चाहन्थें । त्यस्तो फिल्म नआएको पनि धेरै समय भइसकेको थियो । त्यस्तो फिल्मले मासलाई हलसम्म तान्न सक्छ । मासलाई हलमा तान्न सक्नु नै फिल्मकर्मीको जित हो । त्यसकारण मासलाई हलमा ल्याउन पिताम्बर बनाएँ’, उनी भन्छिन् ।

‘पिताम्बर’ पूर्णरुपमा मनोरञ्जनात्मक फिल्म भएकाले दर्शकले काटेको टिकट र छुट्याएको समय खेर नजाने उनी ठोकुवा गर्छिन् । ‘दर्शकले एउटा टिकटमा ३,४ जना हिरोले अभिनय गरेको फिल्म हेर्न पाउनुहुन्छ । पिताम्बरमा नेपालमै पहिलोपटक तीनवटा क्यामेराले खिचेका छौं । बाहिरबाट धेरै प्राविधिक सामान ल्याएका छौं’ उनले भनिन्, ‘फिल्मले दर्शकलाई कनेक्ट नै गर्छ ।’

‘पिताम्बर’को आइडिया सोच्दा सुरुमा कृषाले अभिनेता प्रदीपलाई सम्झिएक थिइन् । ‘आर्यन लुक्स, हल्का दाह्रीजुँगा भएको र राम्रो काम गर्न सक्ने कलाकार चाहिएको थियो । यो तीनवटै गुण मैले प्रदीपमा भेटेँ’ उनले भनिन् ।

‘‘प्रदीप अरुभन्दा फरक छ । मेकरले कलाकारको हेर्ने कुरा भनेको त्यही हो । पर्फमरको रुपमा प्रदीप जेन्टलमेन हो । उसको लुक्स छुट्टै किसिमको छ । अलिक फ्रिली वातावरणमा राम्रो काम गर्छु भन्दा आफू अगाडिको मान्छे पनि त्यति नै फ्रेण्ड्ली हुनु जरुरी छ । यो सबै कुराले प्रदीप उपयुक्त थियो’ उनले भनिन् ।

‘हाम्रो कथा नै स्टारबाट सुरु हुन्छ । त्यसकारण दर्शकको मन मुटुमा बसेको र राम्रो अभिनयका कारण चर्चामा आएका कलाकारलाई नै प्राथमिकता दियौं । कलाकारको पर्फमेन्सभन्दा पनि कोही भन्दा कोही कम नदेखिऊन् भनेर मल्टीस्टार लियौं । तीन प्रमुख कलाकार निश्चित थिए । फिल्म बन्दै गएपछि अन्य कलाकार पनि जोडिनुभयो’, कास्टिङबार उनी सुनिइन् ।

संसारमा ‘हुमन इमोसन’का कथाले स्पर्श गर्ने भएकाले ‘पिताम्बर’मा पनि यस्तै कथा प्रस्तुत गरिएको उनी बताउँछिन् । यो फिल्म तराईमा छायांकन गरिएको छ । मानवीय संवेदनाका कथा देखाउन लोकेसनले फरक नपर्ने उनको दाबी छ ।

‘तराई भौगोलिक हिसाबले सहज छ । फिल्मका लागि चाहिने सामान भारतबाट ल्याएका छौं । बोर्डर नजिक काम गर्दा सहज हुन्छ भनेर नै तराई रोजेको हो’, कृषा भन्छिन् ।

कृषाको मनपर्ने जनरा नै एक्सन हो । एक्सन फिल्मको जस्तो जोश अनि क्यानभास अन्य फिल्ममा कमै मात्र पाइने भएकाले पनि एक्सनप्रति आफ्नो झुकाव भएको उनी बताउँछिन् । ‘दर्शकले ट्रेलर हेरेपछि यो फिल्म हेर्छु भन्ने निर्णय लिनुहुन्छ भन्नेमा म ढुक्क छु’, उनी भन्छिन् ।

उनले सुटिङको समयमा प्रमुख तीन पात्रलाई एकै ठाउँमा राख्नु, सपोर्टिङ क्यारेक्टर, भिलेनलाई एकै समयमा एउटै फ्रेममा राख्नु सर्वाधिक गाह्रो बनेको बताइन् । ‘फिल्मको सबै एक्सन सिक्वेन्समा म आफैं उपस्थित थिएँ । कलाकारको समय मिलाउनु एकदमै गाह्रो भयो । मैले यति डिग्रीको किक हान्नुपर्छ, मेरो पात्रले हुन्छ भन्दैमा धेरै हान्न पाउँदैन भन्ने कुरा थियो’, उनले भनिन् ।

‘पिताम्बर’ चैत २९ मा प्रदर्शन तयारीमा छ ।