२०८१ फागुन २८ गते १४:५९ 
२८ फागुन, काठमाडाैं । जिल्ला समन्वय समिति काठमाडौंको आयोजनामा काठमाडौं जिल्ला अन्तरपालिका फुटबल प्रतियोगिता (डीसीसी कप) हुने भएको छ ।
आयोजकले बुधबार पत्रकार सम्मेलन गर्दै प्रतियोगिता चैत २ देखि ९ गतेसम्म हल्चोकस्थित सशस्त्र प्रहरी बलको मैदानमा सञ्चालन हुने जानकारी गराएको हो ।
फुटबल नेपालको लोकप्रिय यही खेल रहेको र त्यसको विकास र विस्तारमा टेवा पुऱ्याउने र फुटबलका माध्यमबाट अन्तर पालिका समन्वय गर्ने उद्देश्यले यस प्रतियोगिता आयोजना गर्न लागिएको आयोजकले जनाएको छ ।
‘हाम्रो काम नै समन्वय गर्ने भएकोले सबै पालिकाहरुसँग सल्लाल गरेर पहिलो पटक अन्तरपालिका फुटबल प्रतियोगिता गर्न लागेका हाैं’ जिल्ला समन्वय समिति काठमाडौंका अध्यक्ष सन्तोष बुढाथोकीले भने ।
प्रतियोगितामा काठमाडौं जिल्लाको ११ वटै पालिकालाई सहभागी गराउने लक्ष्य रहेको बुढाथोकीले जानकारी दिए । ‘एक महानगर र दस पालिका गरि ११ वटा पालिका छन् । अहिलेसम्म ६ टिम खेल्ने पक्का भइसकेको छ । बाँकीले आज बेलुकासम्म पक्का गर्नुहुन्छ होला’ उनले भने ।
६ देखि ८ वटासम्म भएमा लिग खेलाउने र सबै टिम सहभागी भए नकआउट फर्म्याटमा खेलाउने जनाइएको छ । प्रतियोगिता सञ्चालन गर्न १० देखि १२ लाख खर्च लाग्ने उक्त खर्च सबै पालिकाले नै दामासाही व्यहोर्ने व्यवस्था रहेको छ ।
प्रतियोगिताको विजेताले नगद रु. दुई लाख रुपैयाँ पुरस्कार प्राप्त गर्नेछन् । यस्तै उपविजेताले एक लाख रुपैयाँ पाउनेछ । प्रतियोगिताको सर्वोत्कृष्ट खेलाडीलाई २५ हजार तथा उत्कृष्ट गोलरक्षक र सर्वाधिक गोलकर्तालाई जनही १० हजार रुपैयाँ नगद पुरस्कार प्रदान गरिनेछ ।
प्रतियोगिता सञ्चालनका लागि सशस्त्र प्रहरी बल, अखिल नेपाल फुटबल संघ (एन्फा) र काठमाडौं जिल्ला खेलकुद विकास समितिले प्राविधिक सहयोग गर्ने छन् ।
प्रतियोगितामा सहभागी हुनका लागि सम्बन्धित पालिकाकै स्थानिय खेलाडी हुनुपर्ने आयोजकले जनाएको छ ।
प्रतिक्रिया 4