डिपसिक संस्थापकको गाउँमा दैनिक १० हजार पर्यटक, ढुंगामाटो ‘चिनो’ लानेको ओइरो

२९ फागुन, काठमाडौं । पछिल्लो पटक संसारमा तहल्का मच्चाएको चिनियाँ एआई कम्पनी ‘डिपसिक’ का संस्थापक लियाङ वेनफेङको गृहगाउँ फस्टाउँदो पर्यटन गन्तव्यमा रूपान्तरण हुन थालेको छ ।

डिपसिककै कारण उनको गाउँलाई चीन सरकारले पनि विशेष महत्त्व दिएर पर्यटन गन्तव्यका रूपमा विकास र प्रचार–प्रसार गरिरहेको छ ।

डिपसिक संस्थापक लियाङ जन्मेर हुर्केको सानो गाउँ ‘मिलिङ’ पछिल्लो पटक फस्टाउँदो पर्यटन गन्तव्य बन्दै गएको हो । लियाङको सादगीपूर्ण व्यवहारका कारण स्थानीय गाउँलेलाई पर्यटक आकर्षित गर्न प्रोत्साहन मिलेको साउथ चाइना मर्निङ पोस्टले लेखेको छ ।

मिलिङ गाउँमा बढ्दै गएको पर्यटक संख्याले स्थानीय निकायहरूलाई मिलिङलाई नयाँ स्वरूप दिनका लागि लगानी गर्न पनि सुखद दबाब परेको छ ।

डिपसिक संस्थापक ४० वर्षीय लियाङ मिलिङको एक शिक्षित परिवारमा जन्मिएका हुन् । उनका आमाबुबा दुवै जना शिक्षक हुन् । उनीहरू गाउँकै एक प्राथमिक विद्यालयमा पढाउँछन् ।

मिलिङ गाउँमै प्राथमिक शिक्षा पूरा गरेपछि लियाङले सानो सहर वुचुआनको नम्बर १ माध्यमिक विद्यालयमा भर्ना भएका थिए । यो स्कुल उनको क्षेत्रकै सबैभन्दा चल्तीको थियो ।

सन् २००२ मा लियाङ झेइजियाङ विश्वविद्यालय भर्ना भएका थिए । प्रभावशाली क्षमताकै कारण उनले एकदमै प्रतिस्पर्धी गाओकाओ विश्वविद्यालयको प्रवेश परीक्षा उत्तीर्ण गरेका थिए ।

२०२५ जनवरी अन्तिमतिर लियाङको यात्राले एक्कासि संसारको ध्यान खिच्यो, जब उनले एआई कम्पनी डिपसिक सार्वजनिक गरे । डिपसिक सार्वजनिक भएपछि प्रतिस्पर्धी अमेरिकी कम्पनीहरूमाथि ठूलो चुनौती देखापरेको छ ।

हो, लियाङको यही सफलताबाट प्रेरित भएर हुलका हुल पर्यटक उनको गाउँ घुम्न गइरहेका छन् ।

लियाङको गाउँ मिलिङमा ७ सय घर छन् । जहाँको युवा पुस्ता गाउँ नजिकैको जुत्ता कारखानामा काम गर्छ भने बुढ्यौली लागेकाहरू भने कृषि पेसामा संलग्न छन् ।

लियाङकै सफलतापछि मिलिङ गाउँको पहिचान नै बदलिएको छ । यसअघि विकासमा धेरै नै पछाडि थियो । विगतमा यो गाउँको प्रमुख आम्दानीको स्रोत भनेको माछा पोखरीहरू भाडामा दिएबापत वार्षिक हुने १० हजार युआन अर्थात् १ हजार ४ सय अमेरिकी डलरमात्र थियो ।

त्यसपछि मिलिङ गाउँ यस्तरी फस्टायो कि दैनिक १० हजार पर्यटकले भ्रमण गर्न थाले । तर, पनि त्यहाँका पर्यटन पूर्वाधारको अवस्था भने नाजुक नै छ । जसले पर्यटकको माग पूरा गर्न सक्दैन ।

गाउँका पुराना घरमध्ये २९ वटाको बाहिरी पर्खाल मर्मत गरिको छ । जीर्ण घरहरू भत्काइएका छन् । सडक चौडा पारिएका छन् भने ढल निकास प्रणाली जडान गरिएको छ भने हरियालीका लागि वृक्षारोपण गरिएको छ ।

यद्यपि, लियाङका हजुरबा भने बाध्य भएर घरको ढोका थुनेर बस्ने गरेका छन् । किनभने, गाउँ घुम्न आएका हजारौं पर्यटक डिपसिक संस्थाक लियाङको घर हेर्न आउने गरेका छन् ।

उनको चार तले घर हेर्न आइपुग्ने पर्यटकले घर वरिपरिको माटो, ढुंगा र पातपतिङ्गर समेत लान थालेपछि लियाङ हजुरबा दिउँसोभरि घरको ढोका थुनेर बस्ने गरेका हुन् ।

(यसअघि राखिएको तस्वीर सम्बन्धित व्यक्तिको नभएकोले बदलिएको छः सं.  )