एसियन बैंकर र काठमाडौं फिन्टेकबीच साझेदारी हुने

१ चैत, काठमाडौं । नेपाल र भुटानको बैंकिङ तथा फिन्टेक उद्योगलाई विश्वस्तरीय वित्तीय ज्ञान तथा नेटवर्कमा जोड्ने उद्देश्यले द एसियन बैंकर र काठमाडौं फिन्टेकबीच समझदारीपत्रमा हस्ताक्षर भएको छ ।

काठमाडौं फिन्टेकले ट्याब ग्लोबलको नेपाल र भुटानका लागि आफ्नो एकमात्र आधिकारिक प्रतिनिधिका रूपमा काम गर्ने गरी यो समझदारी भएको हो ।

यसले नेपाली तथा भुटानी बैंकिङ तथा फिन्टेक प्रोफेसनलले द एसियन बैंकर, द बैंकिङ एकेडेमी, ट्याब इन्साइट्स तथा वेल्थ एन्ड सोसाइटी जस्ता ग्लोबल प्लेटफर्ममा पहुँच दिलाउने काठमाडौं फिन्टेकले जनाएको छ ।

‘हामी काठमाडौं फिन्टेकसँगको यो साझेदारीप्रति निकै उत्साहित छौं । नेपालको वित्तीय क्षेत्र डिजिटल रूपान्तरणको यात्रामा छ, र यस प्रक्रियालाई ग्लोबल नलेज एक्स्चेन्ज तथा नेटवर्किङले अझ मजबुत बनाउने छ,’ ट्याब ग्लोबल अध्यक्ष इम्यानुएल ड्यानियलले भने, ‘हामी नेपाली तथा भुटानी वित्तीय संस्थाहरूलाई विश्वस्तरीय अवसर प्रदान गर्न प्रतिबद्ध छौं ।’

नेपाल र भुटानका बैंक तथा फिन्टेक उद्योगको क्षमता अझ विस्तार गर्न ट्याब ग्लोबल जस्तो प्रतिष्ठित संस्थासँगको सहकार्य कोशेढुंगा सावित हुने काठमाडौं फिन्टेकका संस्थापक सञ्जीव सुब्बाले बताए । ‘ग्लोबल बैंकिङ अभ्यास, डिजिटल वित्तीय सेवा, तथा नवीनतम प्रविधिहरूमा नेपाली तथा भुटानी बैंकिङ प्रोफेसनललाई जोड्ने अवसर पाउँदा हामी अत्यन्त उत्साहित छौं,’ उनले भने ।