२०८१ चैत १ गते १६:०८ 
१ चैत, काठमाडौं । भारतको नयाँदिल्लीमा भएको विश्व पारा एथ्लेटिक्स ग्रान्ड प्रिक्समा सहभागी भएको नेपाली टोली स्वदेश फर्किएको छ । रजत पदक विजेता खेलाडीसहितको टोली शुक्रबार नेपाल आइपुगेको हो ।
ग्रान्ड प्रिक्सअन्तर्गत लङजम्पमा नेपालकी प्रभा आङ्देम्बेले रजत पदक जितेकी थिइन् । बिहीबार भएको खेलमा उनले रजत जितेकी हुन् । प्रभासहितको टोलीलाई राखेपका सदस्यसचिव टंकलाल घिसिङलगायतले त्रिभुवन अन्तर्राष्ट्रिय विमानस्थलमा स्वागत गरे ।
विश्व पारा एथलेटिक्स ग्रान्ड प्रिक्समा नेपालबाट ६ खेलाडीहरू सहभागी थिए । प्रभा आङदेम्बेले महिला २ सय/४ सय मिटर दौड र लङजम्पमा भाग लिएकी थिइन् ।
पुरुष ४ सय मिटर दौडमा नवराज कार्की र गोविन्द गिरी, सटपुटमा हिमाल अर्याल र फणिनारायण पौडेल तथा डिस्कस थ्रोमा राजु गुरुङले सहभागिता जनाएका थिए । गोविन्दले ज्याभ्लिन थ्रोमा पनि प्रतिस्पर्धा गरे ।
अफिसियलमा राखेपकी सदस्य अन्जना श्रेष्ठ र मुक्तिनाथ अधिकारी, व्यवस्थापकमा ओमनाथ सिवाकोटी तथा प्रशिक्षकमा विमला राना मगर थिए ।
एक महिनाको अन्तरालमा नेपालले पारा एथलेक्टसमा सहभागिता जनाएको यो दोस्रोपटक हो । नेपाल गत फेब्रुअरी ४ देखि १४ तारिखसम्म दुबइमा भएको ग्रान्ड प्रिक्समा सहभागी भएको थियो ।
तस्वीरहरू : विकास श्रेष्ठ
प्रतिक्रिया 4