चिहानबाट भूतहरू जागेर राजतन्त्र फर्कंदैन : दुलाल

१ चैत, काठमाडौं । बागमती प्रदेशका पूर्वमन्त्री युवराज दुलालले राजतन्त्र फर्काएर देशको विकास हुनै नसक्ने दाबी गरेका छन् ।

सिन्धुपाल्चोक क्षेत्र नम्बर २ मा ३३ वर्षसम्म राजतन्त्र पक्षधरले शासन गर्दा पनि कुनै विकास हुन नसकेको जिकिर गर्दै अब पनि विकासको कुनै सम्भावना नभएको दाबी गरे ।

‘चिहानबाट भूतहरू जागेर आफ्नो मोजमस्ती र अ‍ैसआरामका लागि राजतन्त्र फर्काएर नेपालको विकासको परिकल्पना कहिल्यै पनि हुन सक्दैन,’ माओवादी केन्द्रीय सदस्य समेत रहेका दुलालले भने, ‘न हिजो इतिहासमा भयो न हुने सम्भावना छ ।’

शुक्रबार सिन्धुपाल्चोकको मेलम्ची नगर समितिको सम्मेलन उद्घाटन समारोहमा बोल्ने क्रममा उनले यस्तो बताएका हुन् ।

उनले गणतन्त्र र संघीयतापछि माओवादी नेतृत्वले नै यहाँका सडक लगायतका विकास निर्माणमा भूमिका खेलेको जिकिर गरे ।

राष्ट्रिय प्रजातन्त्र पार्टीका नेता पशुपतिशमशेर राणा पनि यही क्षेत्रबाट प्रतिनिधित्व गर्छन् । उनले राप्रपा नेता राणाप्रति लक्षित गर्दै ३३ वर्षसम्म कुनै विकास नगरी जनतालाई भ्रममा राखेको बताए ।

‘बिडम्बना भोग्नुपरेको क्षेत्र हो यो । जहाँ ३३ वर्ष राजाका पक्षधरले शासन गर्नुभयो र यहाँका जनताले साथ दिन विवस हुनुपर्‍यो,’ दुलालको भनाइ छ ।