३ चैत, काठमाडौं । लुम्बिनी प्रदेशले प्रधानमन्त्री कप पुरूष राष्ट्रिय क्रिकेट प्रतियोगितामा तेस्रो जित हासिल गरेको छ । आइतबार भएको खेलमा लुम्बिनीले बागमती प्रदेशलाई ४८ रनले हराएको हो ।
लुम्बिनीले दिएको ११६ रनको लक्ष्य पछ्याएको बागमती २२.५ ओभरमा ६७ रनमै अलआउट भएको हो । पृथु बास्कोटाले सर्वाधिक १५ रन बनाए । आशुतोष घिरैया र सुमन सुनारले समान ११ रन बनाए । अन्यले दोहोरो अंकमा रन जोड्न सकेनन् ।
लुम्बिनीका लागि बिप्रासन केसी र अजय चौहानले ३-३ विकेट लिए भने निर्मल गुरुङ र रमेश कुर्मीले २-२ विकेट लिए ।
त्यसअघि टस जितेर पहिले ब्याटिङ गरेको लुम्बिनी ३२.४ ओभरमा ११५ रनमा अलआउट भएको थियो । आकाश त्रिपाठीले सर्वाधिक ३३ रन बनाए । मनिष थापा र कप्तान देव खनालले समान १५ रन बनाए । अन्यले दोहोरो अंकमा रन बनाएनन् ।
बागमतीका लागि गौतम केसीले ५.४ ओभरमा २१ रन दिएर ४ विकेट लिए। सुर्य तामाङ र इशान पाण्डेले २-२ तथा रिजन ढकाल र सोनु देवकोटाले १-१ विकेट लिए ।
लुम्बिनीले हालसम्म ४ खेल खेल्दा ३ जित निकालेको छ भने बागमतीले ४ खेलमा १ जित मात्र निकालेको छ ।
प्रतिक्रिया 4