सिभिल अस्पतालमा तलबभत्ताको असमानता हटाएको डा.पौडेलको दावी

३ चैत, काठमाडौं । निजामती कर्मचारी अस्पताल(सिभिल अस्पताल) का नवनियुक्त कार्यकारी निर्देशक प्रा.डा. मोहनचन्द्र रेग्मीले पदभार गह्रण गरेका छन् ।

आइतबार पदभार सम्हालेका उनलाई निवर्तमान निर्देशक डा. विधाननिधि पौडेलले स्वागत गरेका थिए ।

पदभार ग्रहण गर्दै डा. रेग्मीले बिरामीलाई सहज र मैत्रीपूर्ण सेवा दिने प्रतिवद्धता जनाए। ‘स-साना काम र सेवा प्रवाहमा सुधार गर्दै अघि बढ्नेछु । पहिलो प्राथमिकता बिरामीमैत्री सेवा सुनिश्चित गर्नु हुनेछ ’ डा. रेग्मीले भने ।

स्वागत समारोहमा निवर्तमान निर्देशक डा. पौडेलले आफ्नो कार्यकालका उपलब्धि बारे जानकारी दिएका थिए।

डा. पौडेलले आफ्नो कार्यकालमा अस्पतालको सेवा र संरचनामा भएको सुधारको उल्लेख गरेका थिए । अस्पतालमा १६ वर्षदेखि घाटामा रहेको आर्थिक पक्षलाई पनि सुधार गर्न सफल भएको दावी पौडेलले गरे ।

‘कोभिड महामारीका दौरानमा अस्पतालका कार्यहरूलाई निरन्तरता दिँदै अस्पतालको आर्थिक स्थितिमा सुधार ल्याउन सकेका छौं, ‘डा. पौडेलले सुनाए ।

डा. पौडेलले आफ्नो कार्यकालमा अस्पतालभित्रको तलबभत्ताको असमानतालाई समाधान गरेको र करारमा रहेका चिकित्सकलाई स्थायी बनाउन समेत सफल भएको उल्लेख गरे।

त्यसैगरी, अस्पतालमा चिकित्सा शिक्षाको समेत आफूले थालनी गरेको भन्दै उनले केही नयाँ भवनका लागि चिनियाँ पक्षसँग सम्झोता भइसकेको समेत जानकारी दिए ।