डा. मिश्रालाई स्वास्थ्य सचिव नियुक्त नगरिएकोमा सर्वाेच्चले माग्यो कारण

४ चैत, काठमाडौं । स्वास्थ्य तथा जनसंख्या मन्त्रालयकी अतिरिक्त सचिव डा.संगीता कौशल मिश्राले सरकारविरुद्ध सर्वोच्च अदालतमा रिट दायर गरेकी छिन् । वरिष्ठताको क्रममा अगाडि भएपनि आफूलाई स्वास्थ्य सचिव नियुक्त नगरिएको भन्दै मिश्राले चैत १ गते सर्वाेच्चमा रिट निवेदन दिएकी हुन् ।

उनले प्रधानमन्त्री तथा मन्त्रिपरिषद् कार्यालयलाई विपक्षी बनाएकी छिन् । उनको रिटमाथि आइतबार सुनुवाई भएको थियो । न्यायाधीश बालकृष्ण ढकालको एकल इजलासमा भएको सुनुवाई पनि सर्वाेच्चले सरकारका नाममा कारण देखाऊ आदेश जारी गरेको छ ।

साथै छलफलका लागि दुवैपक्षलाई बोलाइएको छ ।

यो पनि पढ्नुहोस

डा. संगीता भन्छिन् : ममाथि अन्याय भयो, स्वास्थ्यमन्त्रीले राजीनामा दिनुपर्छ

२१ फागुनमा बसेको मन्त्रिपरिषद बैठकले अतिरिक्त सचिव डा‍. विकास देवकोटालाई सचिवमा बढुवा गरेको थियो ।

देवकोटा सचिव भएपनि मिश्राले आफूभन्दा जुनियरमा रहेर काम नगर्ने बताएकी थिइन्।

१२ फागुनमा पूर्वसचिव डा‍.रोशन पोखरेलको ५ वर्षे कार्यकाल सकिएसँगै लोकसेवा आयोगले नयाँ सचिवका लागि मन्त्रालयका तीन अतिरिक्त सचिवहरु डा.मिश्रा, डा. विकास देवकोटा र डा.टंक बाराकोटीको नाम मन्त्रिपरिषदमा सिफारिस गरेको थियो ।

मन्त्रिपरिषद्ले डा. विकास देवकोटालाई नियुक्ती गरेसँगै डा. मिश्रले बरिष्ठताको आधारमा आफू हुनुपर्ने भन्दै असन्तुष्टि जनाएकी थिइन् । उनले अनलाइनखबरसँग कुरा गर्दै स्वास्थ्य तथा जनसंख्यामन्त्री प्रदीप पौडेलले आफूमाथि पटक—पटक अन्याय गरेको बताउँदै मन्त्रीको राजीनामा समेत मागेकी थिइन् ।

स्वास्थ्य तथा जनसंख्या मन्त्री प्रदिप पौडेलले शुक्रवार डा. वाराकोटीलाई स्वास्थ्य सेवा विभागको महानिर्देशक बनाएका छन् ।