२०८१ चैत ४ गते १५:५० 
४ चैत, काठमाडौं । प्लानिङ ब्वाइज युनाइटेडले च्यासल युथ क्लबलाई ४-० ले पराजित गर्दै शहीद स्मारक बी डिभिजन लिगमा लगातार दोस्रो जित हात पारेको छ ।
लगातार दोस्रो जितपछि प्लानिङ ब्वाइज दुई खेलबाट ६ अंक जोडेर शीर्ष स्थानमा उक्लेको छ । पहिलो खेलमा प्लानिङ ब्वाइजले झापा फुटबल क्लबलाई २-१ ले पराजित गरेको थियो ।
सातदोबाटोस्थित एन्फा कम्प्लेक्समा शनिवार भएको खेलमा प्लानिङ ब्वाइजलाई जित दिलाउन फागु राम थारुले दुई तथा सुजन डंगोल र अविनाश थापाले एक-एक गोल गरे ।
फागु रामले लिगमा ३ गोल गरिसकेका छन् भने सुजनको दोस्रो गोल हो । दुवैले यसअघि झापा विरुद्ध समान एक गोल गरेका थिए ।
खेलको पहिलो हाफ गोलरहित बराबरीमा सकिएपनि दोस्रो हाफमा प्लानिङ ब्वाइजले चार गोल गरेको हो । सुजनले ५५औं मिनेटमा गोलको खाता खोलेका थिए । त्यसपछि फागुरामले ६०औं मिनेटमा गोल गर्दै अग्रता दोब्बर पारे ।
अविनाशले ७७औं मिनेटमा गोल गरेपछि प्लानिङ ब्वाइजले ३-० को अग्रता बनायो । त्यसपछि फागुरामले ८३औं मिनेटमा व्यक्तिगत दोस्रो गोल गर्दै प्लानिङ ब्वाइजलाई फराकिलो जित दिलाए ।
प्रतिक्रिया 4