आन्तरिक विवादले इन्जिनियरिङ अध्ययन संस्थान पोखरामा नेविसंघको लफडा, क्याम्पस गेटमा टायर बालेर अनसन

५ चैत, पोखरा । नेपाली कांग्रेस तथा ऊ निकट नेपाल विद्यार्थी संघको आन्तरिक विवादका कारण इन्जिनियरिङ अध्ययन संस्थान पश्चिमाञ्चल क्याम्पस पोखरा सोमबारदेखि नै अशान्त छ ।

नेपाल विद्यार्थी संघले पार्टी र संगठनभित्रको आन्तरिक विवादको दोष निर्वाचन समितिलाई लगाउँदै सोमबार रातिसम्मै क्याम्पस गेटमा टायर बाल्दै प्रदर्शन गरेको छ भने अहिले मंगलबार बिहान पनि रिले अनसन जारी राखेको छ ।

नेपाल विद्यार्थी संघको आन्तरिक विवादका कारण सिंगो क्याम्पसमै लफडा निम्तिएको छ भने नेविसंघको एउटा समूहले स्वतन्त्र विद्यार्थी युनियनको निर्वाचन हुन नहुने र फेरि मनोनयन प्रक्रियामा जानुपर्ने माग गरिरहेको छ । तर, निर्वाचन समिति संयोजक दीपक थापाले भने चुनाव नरोकिने दाबी गरिरहेका छन् ।

सोमबार रातिसम्म वार्ता भएको थियो । तर वार्ता टुंगोमा पुग्न सकेन । नेपाल विद्यार्थी संघले सचिव पदमा मनोनयन दर्ता गराउन नसकेपछि आन्तरिक विवाद छताछुल्ल भएको हो । कास्की पार्टी नेतृत्वले सचिवविनै निर्वाचनमा जाने परिस्थिति निर्माण गरेको भन्दै विद्यार्थीले नाराबाजी गरेका थिए ।

नेविसंघले सौगात पण्डितको अध्यक्षतामा निर्वाचनमा जान मनोनयन दर्ता गराएको थियो । तर, सचिव पदमा आफूले भनेको मान्छेले टिकट नपाएको भन्दै मनोनयन पत्र नै च्यातिएको नेविसंघकै एउटा समूहले आरोप लगाइरहेको छ ।

नेविसंघ केन्द्रीय कमिटीले सचिवको उम्मेदवार प्रशान्त उपाध्यायलाई बनाउन भन्दै परिपत्र नै गरेको थियो ।

केन्द्रीय अध्यक्ष दुजाङ शेर्पाको नामबाट परिपत्र भए पनि कांग्रेस कास्की सभापति किशोरदत्त बराललगायतले सचिवविनै निर्वाचनमा जाने वातावरण बनाएको भन्दै नेतृत्वप्रति नै नेविसंघका नेताहरु रुष्ट छन् । असन्तुष्ट पक्षले कास्की पार्टी सभापति किशोरदत्त बराललाई ‘सचिव बेचुवा’को संज्ञा दिँदै पोस्टरसमेत टाँसेको थियो ।

नेविसंघका केन्द्रीय सदस्य तथा क्याम्पसका केन्द्रीय प्रतिनिधि राजेन्द्र बरालले निर्वाचन समितिको त्रुटिका कारण सचिव मनोनयन हुन नसकेको भन्दै निर्वाचन हुन नसक्ने दाबी गरे । मनोनयनका लागि फर्म दिएर पनि दर्ता नगरिएको उनको दाबी छ ।

केन्द्रको परिपत्र हुँदाहुँदै सचिवविनै निर्वाचन अगाडि बढ्ने देखेपछि तालाबन्दी गरिएको र कास्की सभापतिलगायत केही नेताले खेल्ने प्रयास गरेको उनीहरुको आरोप छ । नेविसंघका विद्यार्थीहरुले आफूले भनेको मान्छे सचिव नपाएपछि रेजिना खड्काले मनोनयन पत्र नै च्यातेकोसमेत आरोप लगाइरहेका छन् ।

२०७९ को चुनावमा नेपाल विद्यार्थी संघकै आन्तरिक विवादका कारण क्याम्पसको चुनाव बिथोलिएको थियो । यसपटक पनि उनीहरुकै कारण चुनाव बिथोल्न खोजिएको आरोप अन्य विद्यार्थी संगठनहरुको छ ।

नेविसंघको आन्तरिक विवादका कारण क्याम्पस अशान्त भएको र चुनावसमेत अन्योलमा परेको स्ववियुमा अनेरास्ववियु अध्यक्षका उम्मेदवार अनुप न्यौपानेले बताए ।

निर्वाचन समिति संयोजक दीपक थापाले बिहानैदेखि चुस्त सुरक्षा व्यवस्था गरिएको र चुनाव अगाडि बढाउने तयारी भइसकेको जानकारी दिए ।

‘सहमति गर्ने कोसिस पनि गर्‍यौं तर सहमति हुन सकेन । जिल्लास्तरका प्रतिनिधिहरु पनि बसेका थियौं । नेविसंघले तालाबन्दी गरेको थियो । त्यो तालाबन्दी पश्चिमाञ्चल इकाइ समितिले खोल्यो । नेविसंघकै एउटा समूह चुनावमा जान चाहन्छ भनेर आएपछि प्रशासनलाई पत्र पनि दिनुभयो,’ उनले भने, ‘रिले अनसन गर्ने, नाराजुलस गर्ने काम गर्नुभएको छ तर चुनाव रोकिँदैन ।’

इन्जिनियरिङ अध्ययन संस्थानमा २ हजार ४१ मतदाता छन् । २०४३ सालमा स्थापना भएको क्याम्पसमा स्ववियु निर्वाचन हुन सकेको छैन ।