+

डिफेन्समा भरपर्दा खेलाडी अनन्त

२०८१ चैत  ५ गते १७:३४ २०८१ चैत ५ गते १७:३४

२७ वर्षीय अनन्त पछिल्लो एक दशकदेखि नेपाली राष्ट्रिय टोलीमा नियमित सदस्यको रुपमा छन् । अहिले उनी टिममा भएकामध्ये अनुभवी खेलाडीमा पर्छन् भने डिफेन्समा रोहित चन्दसँगै अनुभवी खेलाडी हुन् ।

डिफेन्समा भरपर्दा खेलाडी अनन्त

अनन्त तामाङ नेपाली राष्ट्रिय टिमका डिफेण्डर हुन् । २७ वर्षीय अनन्त पछिल्लो एक दशकदेखि नेपाली राष्ट्रिय टोलीमा नियमित सदस्यको रुपमा छन् । अहिले उनी टिममा भएकामध्ये अनुभवी खेलाडीमा पर्छन् भने डिफेन्समा रोहित चन्दसँगै अनुभवी खेलाडी हुन् ।

मुख्यगरी विपक्षीका फरवार्डलाई रोक्ने र गोलकिपरभन्दा अघि रहेर गोल गर्नबाट बचाउने काम अनन्तको हुन्छ । तर उनले आवश्यक परेको बेला अगाडि बढेर नेपालको सिनियर टिमका लागि गोल समेत गरेका छन् । अर्को शब्दमा भन्दा अनन्त डिफेन्समा भरपर्दा खेलाडी हुन् ।

अनन्तले सन् २०१५ मा भारतविरूद्धको खेलबाट नेपालको सिनियर टोलीमा डेब्यु गरेका थिए । त्यसयता उनी चोटको बेलाबाहेक नियमित नेपाली टोलीको सदस्यका रूपमा छन् । अनन्तले नेपालका लागि ६० भन्दा बढी खेल खेल्दै ३ गोल समेत गरेका छन् ।

अनन्त इन्डियन सुपर लिग (आईएसएल) खेल्ने पहिलो नेपाली खेलाडी समेत हुन् । उनले सन् २०२२ मा इस्ट बेंगलका लागि खेल्दै आईएसएलमा डेब्यु गरेका थिए ।

उनले आफ्नै कप्तानीमा नेपालको शीर्ष श्रेणीको ए डिभिजन लिग र नेपाल सुपर लिग (एनएसएल) को उपाधि समेत जितेका छन् । उनको कप्तानीमा चर्च ब्वाइज युनाइटेडले ए डिभिजन लिग र ललितपुर सिटी एफसीले एनएसएलको उपाधि जितेको थियो । उनी कप्तानको रुपमा ए डिभिजन लिग र एनएसएल जित्ने एक मात्र खेलाडी हुन् ।

त्यही विशेषताले गर्दा एनएसएलको तेस्रो सिजनका लागि पनि साविक विजेता ललितपुरले अनन्तलाई मार्की प्लेअरकै भूमिकामा निरन्तरता दिएको छ ।

तेस्रो सिजनका लागि पुरानै क्लबमा मार्की निरन्तर रहने अनन्त एक मात्र खेलाडी हुन् ।

सुरुवाती करियर

झापाका अनन्तले सानो हुँदा देखि नै फुटबल खेल्थे । दाईहरुले खेलेको देखेर उनी पनि फुटबलप्रति आकर्षित भएका थिए ।

सानोमा फुटबल खेल्दा देखि नै उनी डिफेन्समै खेल्थे । किनभने सिनियर दाईहरुले फरवार्डमा खेल्दै उनलाई डिफेण्डर बनाउँथे । पछि त्यही पोजिसनमै उनका लागि प्यारो भए र नेपालका लागि अब्बल डिफेण्डर बने ।

डिफेन्स भएकोले फरवार्डको जस्तो चर्चा नभएपनि अनन्त आफ्नो खेलमा पोख्त छन् । उनी पछिल्लो समय नेपाली डिफेन्सको खम्बाका रुपमा छन् ।

डिफेण्डर हुँदा अनन्तले अलि ढिला डेब्यु गरे । किनभने उनका टिममेट विमल घर्ती मगर र अन्जन विष्टले फरवार्ड भएकोले अलि चाँडै डेब्यु गर्ने अवसर पाए ।

झापाबाट छनोट भएर एन्फा एकेडेमीमा आएपछि अनन्तले सबै उमेर समूहमा नेपालका लागि खेले जहाँ उनै विमल र अन्जन उनको टिममेट थिए । उमेर समूहदेखि राष्ट्रिय टिमसम्म उनीहरुले धेरै समय सँगै खेले ।

एन्फा एकेडेमीपछि अनन्तले युरोपमा समेत ट्रायल दिएका थिए । उनले स्पेनको मार्वेला युनाइटेडमा ट्रायल दिनुका साथै त्यहाँ रहँदा नेदरल्याण्ड्स, जर्मनी र बेल्जियममा पुगेर खेलहरु समेत खेले । त्यही समयमा फ्रान्सको एफसी ट्रोएसमा पनि एक साताका लागि ट्रायल दिन गए ।

एन्फा एकेडेमीमै रहँदा उनले नेपालका लागि साफ यू-१६ च्याम्पियनसिप, एएफसी यू-१६ च्याम्पियनसिप र साफ यू-१९ च्याम्पियनसिप समेत खेले ।

अनन्तले सन् २०१३ मा नेपालमै भएको साफ यू-१६ च्याम्पियनसिप पहिलो पटक खेलेका थिए । घरेलु मैदानमा भएको उक्त प्रतियोगितामा नेपाल फाइनलमा भारतसँग १-० ले पराजित हुँदै उपविजेता बनेको थियो ।

त्यसपछि एएफसी यू-१६ च्याम्पियनसिप छनोट खेले । जहाँ नेपाल छनोट चरण पार गर्दै अन्तिम चरणमा पुगेको थियो । एन्फाको त्यो ब्याचले उमेर समूहमा राम्रो प्रदर्शन गरेको थियो । सन् २०१४ मा एएफसी यू-१६ च्याम्पियनसिपमा नियमित कप्तान विमल घर्ती मगर अनुपस्थित हुँदा अनन्तले नेपालको कप्तानी समेत गरेका थिए ।

यस्तै सन् २०१५ मा घरेलु मैदानमै भएको साफ यू-१९ च्याम्पियनसिपको उपाधि नेपालले जित्दा अनन्तले मुख्य भूमिका निभाएका थिए । उनले नेपालले खेलेका हरेक खेल खेलेका थिए ।

अनन्तले फाइनलमा भारतविरूद्ध विजयी गोल गरेका थिए । अनन्तले एएफसी यू-१९ छनोट र एएफसी यू-२३ च्याम्पियनसिप छनोट समेत खेलेका थिए ।

राष्ट्रिय टिममा डेब्यु र सफलता

अनन्तले उमेर समूहको टिममा हुँदै सन् २०१५ मा भारत विरुद्ध उसैको भूमिमा नेपालको सिनियर टिममा डेब्यु गरे । सन् २०१५ अगष्ट ११ मा पुनामा भएको उनको ब्याचका अन्जन विष्ट र विमल घर्तीमगरले नेपालको फरवार्ड लाइन सम्हालेका थिए ।

त्यसयता उनी नियमित जसो नेपली टिममा छन् । डिफेन्स भएकोले फरवार्डको जस्तो चर्चा नभएपनि अनन्त आफ्नो खेलमा पोख्त छन् । उनी पछिल्लो समय नेपाली डिफेन्सको खम्बाका रुपमा छन् ।

अनन्तले राष्ट्रिय टिमबाट विभिन्न उपाधि समेत जितेका छन् । उनले सन् २०१६ मा भारतमा भएको १२औं साग र २०१९ मा नेपालमै भएको १३औं सागमा नेपालका लागि स्वर्ण जितेका थिए । सागमा यू२३ टिम खेल्ने प्रावधान रहेकोले यो सिनियर टिम भने थिएन ।

यस्तै सन् २०१६ मै मलेसियामा भएको एएफसी सोलिडारिटी कप जित्दा उनी नेपाली टिममा थिए । यस्तै २०१६ मै नेपालले बंगबन्धु गोल्डकप जित्दा पनि अनन्त टिममा थिए । यी सबै उपाधि जितेपछि अनन्त नेपाली डिफेन्सको मुख्य खेलाडीको रुपमा स्थापित भए ।

अनन्तले नेपालका लागि ६० खेलमा ३ गोल गरेका छन् । उनले पहिलो गोल सन् २०१६ मा एएपसी सोलिडारिटी कप अन्तर्गत सेमिफाइनलमा लाओस विरुद्ध गरेका थिए । उनको गोलमा नेपालले उक्त खेलमा २-१ को अग्रता बनाएको थियो । तर पछि खेल बराबरी भयो र नेपालले पेनाल्टीसुटआउटमा खेल जितेको थियो ।

यस्तै दोस्रो गोल २०१६ मा बंगलादेशमा भएको साफ च्याम्पियनसिप अन्तर्गत भुटानविरूद्ध गरेका थिए । तेस्रो गोल पनि लाओस विरुद्ध नै थियो । यो गोल भने उनले सन् २०२३ मा घरेलु मैदानमा भएको प्राइम मिनिस्टर थ्री नेसन्स कपमा गरेका थिए ।

उनले आवश्यक परेको बेला नेपालको उमेर समूहदेखि क्लब फुटबलमा समेत कप्तानी भूमिका निर्वाह गरिसकेका छन्, र आवश्यक परेमा राष्ट्रिय टिमको कप्तानी गर्न सक्ने छनक देखाइसकेका छन् ।

अनन्तले एकै वर्ष चर्च ब्वाइज युनाइटेडबाट ए डिभिजन लिग र ललितपुर सिटी एफसीबाट नेपाल सुपर लिग जित्दा कप्तानी भूमिकामा थिए । दुवै प्रतियोगितामा उनी कप्तान मात्र नभई उत्कृष्ट खेलाडी बन्दै एमभीपी (मोस्ट भ्यालुएबल प्लेयर) अवार्ड समेत पाएका थिए ।

अनन्तका उपलब्धिहरू

राष्ट्रिय टोलीबाट
साफ यू-१९ च्याम्पियनसिप विजेता २०१५

बंगबन्धु गोल्डकप विजेता २०१६
एएफसी सोलिडारिटी कप विजेता २०१६
१२औं दक्षिण एसियाली खेलकुद स्वर्ण पदक २०१६
१३औं दक्षिण एसियाली खेलकुद स्वर्ण पदक २०१९

क्लबबाट
शहीद स्मारक ए डिभिजन लिग उपाधि (२०२३, चर्च ब्वाइज युनाइटेड)

नेपाल सुपर लिग उपाधि (२०२३, ललितपुर सिटी एफसी)
ए डिभिजन लिग एमभिपी (२०२३)
नेपाल सुपर लिग एमभिपी (२०२३)

अनन्त तामाङ

धेरै कमेन्ट गरिएका

लेखक
गोविन्दराज नेपाल
यो खबर पढेर तपाईलाई कस्तो महसुस भयो ?
Khusi chhu

खुसी

Dukhi chhu

दुःखी

Achammit chhu

अचम्मित

Utsahit Chhu

उत्साहित

Akroshit Chhu

आक्रोशित

प्रतिक्रिया

भर्खरै पुराना लोकप्रिय