२०८१ चैत ५ गते १६:३१ 
५ चैत, काठमाडौं । इशान पाण्डेले अर्धशतक बनाउँदै बलिङमा ४ विकेट पनि लिएपछि बागमती प्रदेशले प्रधानमन्त्री कप पुरूष राष्ट्रिय क्रिकेट प्रतियोगितामा दोस्रो जित निकालेको छ । मंगलबार भएको खेलमा बागमतीले गण्डकी प्रदेशलाई ६९ रनले हराएको हो ।
बागमतीले दिएको २८९ रनको बलियो लक्ष्य पछ्याएको गण्डकी ४४ ओभरमा २१९ रनमा अलआउट भयो । वंश क्षेत्रीले अर्धशतक बनाएपनि पर्याप्त हुन सकेन । उनले सर्वाधिक ५५ रन बनाए । समीर कँडेलले २६ तथा अमृत गुरुङले २० रन बनाए ।
बागमतीका लागि इशानले ६ ओभरमा २७ रन दिएर ४ विकेट लिए । साकार गजुरेलले २ विकेट लिए भने रिजन ढकाल, गौतम केसी र सुर्य तामाङले १-१ विकेट लिए ।
सिद्धार्थ क्रिकेट रंगशालामा त्यसअघि टस हारेर पहिले ब्याटिङको निम्तो पाएको बागमतीले इशान, शुभ कंसाकार र बिपिन आचार्यको अर्धशतकमा ५० ओभरमा ८ विकेट गुमाएर २८८ रन बनाएको थियो ।
इशान पाण्डेले सर्वाधिक ६९ रन बनाएका थिए भने बिपिन ६३ रनमा अविजित रहे । शुभ कंसाकारले ५२ रन बनाए । २११ रन बनाउँदा ८ विकेट गुमाएको बागमतीका लागि बिपिनले रिजन ढकालसँग मिलेर अविजित ७८ रनको साझेदारी गर्दै बलियो योगफलमा पुर्याएका हुन् ।
बिबेक मगरले ३४ रन बनाउँदा रिजन ढकाल २३ रनमा अविजित रहे । गण्डकीका लागि अर्जुन कुमालले ७ ओभरमा ४० रन दिएर ४ विकेट लिए । कप्तान बिपिन खत्री र सुबास भण्डारीले २-२ विकेट लिए ।
बागमतीले ५ खेल खेल्दा २ जितसहित ४ अंक जोडेर अंकतालिकामा छैटौं स्थानमा उक्लिएको छ । गण्डकीले हालसम्म ५ खेल खेल्दा १ जित मात्र निकालेको छ र २ अंकसहित आठौं स्थानमा छ ।
प्रतिक्रिया 4