+

बी डिभिजन लिग : बाँसबारीको पहिलो जित, ब्वाइज युनियन र टुसालले अंक बाँडे

२०८१ चैत  ६ गते २१:२८ २०८१ चैत ६ गते २१:२८
बी डिभिजन लिग : बाँसबारीको पहिलो जित, ब्वाइज युनियन र टुसालले अंक बाँडे

६ चैत, काठमाडौं । सहिद स्मारक बी डिभिजन लिग फुटबलमा बुधबार बाँसबारी क्लबले पहिलो जित हासिल गर्दा ब्वाइज युनियन र टुसाल युथ क्लबले बराबरी खेलेका छन् ।

सातदोबाटोस्थित एन्फा कम्प्लेक्सको मैदानमा भएको दिनको दोस्रो खेलमा बाँसबारीले अन्नपूर्ण क्लब (आरसीटी)माथि ४–२ को रोमाञ्चक जित हात पारेको हो ।

पहिलो खेलमा सरस्वती युथ क्लबसँग २-१ ले पराजित भएको बाँसबारीले पहिलो जितपछि ३ अंक जोडेको छ र अंकतालिकामा पाँचौ स्थानमा उक्लेको छ ।

आरसीटीको भने यो लगातार दोस्रो हार हो । आरसीटी आफ्नो पहिलो खेलमा श्री भगवती क्लबसँग ३–१ ले पराजित भएको थियो । लगातार दुई हारपछि अंकविहिन आरसीटी पुछारमा झरेको छ ।

पहिलो हाफमा सरोज दर्लामी मगर १६औं र बिके राईले २५औं मिनेटमा गोल गरेपछि बाँसबारीले खेलमा २-० को अग्रता लिएको थियो । तर दोस्रो हाफमा आरसिटीले लगातार दुई गोल गर्दै खेलमा फर्कियो । आरसिटीका लागि मन्जिल खड्काले ५२औं र सुदीप लामाले ७४औं मिनेटमा गोल गरेपछि खेल २-२ को बराबरीमा आयो ।

तर त्यसपछि बाँसबारीले दुई गोल थप्यो । संगम खाण्ड ठकुरीले ७८औं मिनेटमा पेनाल्टीमार्फत गोल गरेपछि बाँसबारीलाई फेरि अग्रता दिलाए । त्यसपछि बिके राईले ८४औ मिनेटमा व्यक्तिगत दोस्रो गोल गर्दै बाँसबारीलाई पहिलो जित दिलाए ।

बुधबारै भएको पहिलो खेलमा ब्वाइज युनियन क्लब र टुसाल युवा क्लबले गोलरहित बराबरी खेल्दै अंक बाँडेका छन् । ब्वाइज युनियनका शेखर जिमीले अन्तिम समयमा रातो कार्ड पाउँदै मैदान छाडेका थिए ।

ब्वाइज युनियन र टुसाल युथ क्लब दुवैको यो लगातार दोस्रो बराबरी हो । ब्वाइज युनियनले पहिलो खेलमा नयाँबस्ती युथ क्लबसँग गोलरहित बराबरी खेलेको थियो । यस्तै टुसाल युथ क्लबले मध्यपुर युथ एसोसिएसनसँग १-१ को बराबरी खेलेको थियो । दुवै टिमको दुई खेलबाट समान २ अंक भएको छ ।

बी डिभिजन लिगको दोस्रो चरण अन्तर्गत अन्तिम खेलमा बिहीबार नयाँबस्ती युथ क्लब र सरस्वती युथ क्लबबीच क्लबबीच प्रतिस्पर्धा हुनेछ । सरस्वतीले पहिलो खेलमा जित हात पार्दा नयाँबस्तीले ब्वाइज युनियनसँग बराबरी खेलेको थियो ।

प्लानिङ ब्वाइज क्लब र श्री भगवती क्लबले लगातार दोस्रो खेल जित्दै ६ अंक जोडिसकेका छन् ।

बी डिभिजन लिग
लेखक
अनलाइनखबर
यो खबर पढेर तपाईलाई कस्तो महसुस भयो ?
Khusi chhu

खुसी

Dukhi chhu

दुःखी

Achammit chhu

अचम्मित

Utsahit Chhu

उत्साहित

Akroshit Chhu

आक्रोशित

प्रतिक्रिया

भर्खरै पुराना लोकप्रिय