२०८१ चैत ८ गते १५:५५ 
८ चैत, काठमाडौं। सन्दीप जोराको अर्धशतकमा एपीएफ क्लबले प्रधानमन्त्री कप पुरुष राष्ट्रिय क्रिकेट प्रतियोगितामा चौथो जित निकालेको छ । शुक्रबार भएको खेलमा एपीएफले सुदूरपश्चिम प्रदेशलाई ३ विकेटले हराएको हो ।
सुदूरले दिएको १९२ रनको लक्ष्य एपीएफले ३६.३ ओभरमा ७ विकेटको क्षतिमा पूरा गर्यो । एपीएफका लागि सन्दीप जोराले ६८ बलमा ५ चौकासहित ५१ रन बनाए । आसिफ शेखले ३२ रन बनाए ।
सुदूरका लागि शेर मल्ल, विकास आग्री र नारायण जोशीले १-१ विकेट लिए ।
त्यसअघि सिद्धार्थ क्रिकेट रंगशालामा टस जितेर पहिले ब्याटिङ गरेको सुदूरपश्चिमले ४८.५ ओभरमा १९१ रन बनाएको थियो । निश्चल क्षेत्रीले ५७ तथा प्रकाश पाण्डेले ४२ रन बनाएका थिए ।
एपीएफका रोहित पौडेल र अमरसिंह राउटेलाले ३-३ विकेट लिँदा भुवन कार्कीले २ र अभिषेक गौतमले १ विकेट लिए ।
एपीएफले ६ खेलमा ८ अंक जोड्दै फाइनल सम्भावना कायमै राखेको छ । ७ खेलमा ४ अंक मात्र भएको सुदूर फाइनल होडबाट बाहिरिसकेको छ ।
प्रतिक्रिया 4