२०८१ चैत ८ गते १६:४६ 
८ चैत, काठमाडौं । दिपेन्द्र रावतले ब्याटिङ र बलिङ दुवैमा राम्रो प्रदर्शन गरेपछि प्रधानमन्त्री कप पुरुष राष्ट्रिय क्रिकेट प्रतियोगितामा कर्णाली प्रदेशले चौथो जित निकाल्दै फाइनल सम्भावना कायमै राखेको छ ।
शुक्रबार एकस्ट्राटेक ओभल मैदानमा भएको खेलमा कर्णालीले मधेश प्रदेशलाई ८१ रनले हराएको हो । कर्णालीले दिएको २२१ रनको लक्ष्य पछ्याएको मधेश ३५.२ ओभरमा १३९ रनमा अलआउट भयो।
मधेशका लागि रुपेश सिंहले सर्वाधिक ३० तथा विशाल पटेलले २५ रन बनाए । हरिशंकर साहले १८ रन बनाउँदा शैलेन्द्र साहले १० रन बनाए ।
कर्णालीका लागि दिनेश अधिकारीले १० ओभरमा ४१ रन दिएर ४ विकेट लिए भने दिपेन्द्र रावतले ३ विकेट लिए । प्रकाश जैसीले २ तथा सुनिल धमलाले १ विकेट लिए ।
त्यसअघि टस जितेर पहिले ब्याटिङ गरेको कर्णालीले ४९.१ ओभरमा अलआउट हुँदै २२० रन बनाएको थियो । दिपेन्द्र रावतले सर्वाधिक ६१ रन बनाए । अर्जुन घर्तीले २६, दिनेश अधिकारीले २४ प्रकाश जैसीले १८ रन बनाए ।
मधेशका लागि रुपेश सिंह, रन्जित कुमार, हरिशंकर साह, कमल गुप्ता र अनिल साहले २-२ विकेट लिए ।
योसँगै ७ खेलमा ८ अंक जोडेको कर्णालीले फाइनल पुग्ने सम्भावना कायमै राख्दा ६ खेलमा ४ अंक मात्र जोडेको मधेश फाइनल होडबाट बाहिरिसकेको छ ।
प्रतिक्रिया 4