बीमा प्राधिकरणका निर्देशनलाई एकीकृत गर्दैछौं : ओझा

१० चैत, काठमाडौं । नेपाल बीमा प्राधिकरणले यसअघि जारी गरेका निर्देशनलाई एकीकृत गर्ने कार्य भइरहेको अध्यक्ष शरद ओझाले बताएका छन् ।

आइतबार काठमाडौंमा ‘बीमा क्षेत्रको अबको बाटो विषयक अन्तरक्रिया कार्यक्रममा उनले बीमकहरूले प्राधिकरणबाट विगतमा जारी भएका निर्देशनलाई एकीकृत रूपमा ल्याइदिन गरेको माग सम्बोधन गर्न प्राधिकरणले काम गरिरहेको बताए ।

आफू प्राधिकरणमा आएको केही दिनमै निर्देशनलाई एकीकृत गर्नका लागि कमिटी बनाएर काम सुरु गरेको उनको भनाइ छ ।

नियमावलीमा परेका विषयलाई निर्देशनबाट हटाउने र आवश्यक पुनरावलोकन भएको ठाउँमा समयानुकुल बनाउने उनले बताए ।

उनले दुई महिनाभित्र काम सकिसक्ने र बीमकलाई सहजता प्रदान गर्ने प्रतिबद्धता जनाए ।

बीमा क्षेत्रको हितका लागि सम्पूर्ण स्टेक होल्डरको हित सुनिश्चित हुनुपर्ने उनको भनाइ छ ।

‘५५ वटा जति निर्देशनहरू छन्, सम्भवतः डेढ, दुई महिनामा त्यसलाई हामी जीवन बीमा, निर्जीवन बीमा, पुनर्बीमा, लघु बीमाहरूका लागि फरक-फरक सेक्सनमा हुनेगरी प्रकाशित गर्नेछौं,’ उनले भने, ‘जसले तपाईंहरूलाई कार्यान्वयन गर्न सहज होस्, दुविधा उत्पन्न नहोस्, छरिएका विषयलाई एक ठाउँमा ल्याएर थप व्यवस्थित, थप संशोधन गर्ने काम निरन्तर हुनेछ ।’