+
+
Shares
टेलिभिजन :

‘कमेडी नाइट विथ च्याम्पियन्स’ चैत १९ देखि, दीपक र जितु पहिलो पाहुना

भव्य सेट र नयाँ संरचनाअनुसार शोको शनिबार छायांकन गरिएको छ । निर्देशक विशाल भण्डारीले पहिलो एपिसोडको छायांकन भएको जनाए । उनका अनुसार अभिनेताद्वय दीपकराज गिरी र जितु नेपाल पहिलो पाहुना हुनेछन् ।

अनलाइनखबर अनलाइनखबर
२०८१ चैत १० गते १६:३९

काठमाडौं । टेलिभिजन कार्यक्रम ‘कमेडी नाइट विथ च्याम्पियन्स’को प्रसारण १९ चैत मंगलबारदेखि सुरु हुने भएको छ । हिमालय टिभीले पूर्वनिर्धारित मितिभन्दा एक साता ढिलो हुने गरि कार्यक्रम आउन लागेको जनाएको छ ।

भव्य सेट र नयाँ संरचनाअनुसार शोको शनिबार छायांकन गरिएको छ । निर्देशक विशाल भण्डारीले पहिलो एपिसोडको छायांकन भएको जनाए । उनका अनुसार अभिनेताद्वय दीपकराज गिरी र जितु नेपाल पहिलो पाहुना हुनेछन् ।

प्राप्त तस्वीरमा पनि यी दुईजनालाई स्टेजमा देख्न सकिन्छ । ‘हामीले पहिलो एपिसोडमा दीपक र जितुसहित दीपाश्री निरौलालाई एउटै फ्रेममा समेटेका छौं’ भण्डारीले अनलाइनखबरसँग भने ।

पछिल्लो समय बेग्ला बेग्लै काम गरिरहेका दीपक-जितु र दीपाश्रीलाई एउटा फ्रेममा देखिनुले यी तीनबीच एकापसमा हार्दिक सम्बन्ध कायम भएको रुपमा बुझ्न सकिन्छ । हालैैको एक अन्तर्वार्तामा जितुले आगामी ‘छक्कापञ्जा’ सिरिजमा देखिन सक्ने संकेत पनि गरेका थिए ।

दीपाश्री यो शोकी अध्यक्ष हुन् । प्रभात लामा, भरतमणि पौडेल, कैलाश कार्की, सन्तोष थापा, पवन भट्टराई, सजन श्रेष्ठ, सुमन कार्की, मेक्सम गौडेल र सुमन कोइरालाले शोमा हास्य प्रस्तुति दिनेछन् ।

‘यसपटक हामीले डेढ घण्टा हँसाउने प्रयास गर्नेछौं’, निर्देशक भण्डारीले भने, ‘यसपटक भव्य सेटमा कार्यक्रम सञ्चालन हुनेछ । यसअघि आर्थिक अभावमा सेटमा कम्प्रोमाइज गर्नुपरेको थियो । यसपटक हिमालय टिभीसँगको सहकार्यमा ठूलो सेट तयार भएको छ ।’

प्राप्त तस्वीर हेर्दा पनि कार्यक्रमको सेट भव्य देखिन्छ । यसपटक नयाँ संरचना र डिजाइनसहित आएको कार्यक्रमलाई ‘स्टेज कमेडी’मा जोड दिइएको छ । दुई-तीनजना कमेडियनले अतिथिसँग अन्तरक्रिया र व्यंग्य गर्नेछन् ।

एक वर्षसम्म ५२ एपिसोड तयार गर्ने र त्यसपछि ‘कमेडी च्याम्पियन’मा जुट्ने निर्माता कम्पनी थ्री प्रोडक्सन प्रालिको तयारी छ । यो शो हिमालय टिभीमा प्रसारण र युट्युबमा ओएसआर रियालिटी च्यानलबाट स्ट्रिमिङ हुनेछ ।

यो खबर पढेर तपाईलाई कस्तो महसुस भयो ?
Khusi chhu

खुसी

Dukhi chhu

दुःखी

Achammit chhu

अचम्मित

Utsahit Chhu

उत्साहित

Akroshit Chhu

आक्रोशित

प्रतिक्रिया

भर्खरै पुराना लोकप्रिय
Advertisment

धेरै कमेन्ट गरिएका

छुटाउनुभयो कि ?