६ दिनपछि बढ्यो सेयर बजार, सबै सेक्टरमा वृद्धि

११ चैत, काठमाडौं । अघिल्ला ६ कारोबार दिन लगातार घटेको सेयर बजार सोमबार बढेको छ ।

बजारको परिसूचक नेप्से अघिल्लो दिनको तुलनामा आज २६.१० अंक (०.९९ प्रतिशत) बढेको हो । सो वृद्धिपछि नेप्से २६४० अंकमा कायम भएको छ । कारोबार सुरु हुँदा केही गिरावट देखिएको बजार ११ : १९ मा २५९३ अंकसम्म झरेको थियो । त्यसपछि बजारले समातेको बढ्दो गति अन्तिमसम्म कायमै रह्यो ।

चैत ३ यता कारोबार भएका ६ दिन बजार लगातार घटेको थियो । फागुन १९ गतेबाट ओरालोमा देखिएको बजार २८ गते एक दिन बढेको थियो ।

बजारको परिसूचक बढ्दा पनि कारोबार रकम घटेको छ । अघिल्लो दिन ६ अर्ब ३२ करोडको कारोबार भएकोमा आज ४ अर्ब ४८ करोडको भयो । २१० कम्पनीको मूल्य बढ्दा ३३ को घट्यो ।

यस दिन सबै सेक्टरका सूचक बढेका छन् । फाइनान्स सबैभन्दा धेरै ३.५ प्रतिशत बढ्यो । बैंकिङ ०.७१, विकास बैंक ०.७१, होटल तथा पर्यटन १.०३, हाइड्रोपावर ०.९५, लगानी ०.८३, जीवन बीमा १.४६, उत्पादन ०.७८, माइक्रोफाइनान्स ०.७९, निर्जीवन बीमा ०.६५, अन्य १.५० तथा व्यापार १.०६ प्रतिशत बढे ।

गार्डियन माइक्रोलाइफ इन्स्योरेन्सको मूल्य सबैभन्दा धेरै ९.५१ प्रतिशत बढ्यो । उपकार लघुवित्तको ८, पोखरा फाइनान्सको ७.७, समृद्धि फाइनान्सको ६.०४, स्वेतगंगा हाइड्रोपावरको ५.४६ प्रतिशत बढ्यो ।

अपरहेवाखोला हाइड्रोपावरको ४.२६, नारायणी डेभलपमेन्ट बैंकको ३.३८ तथा बाराही हाइड्रोको २.५ प्रतिशत मूल्य घट्यो ।

कारोबार रकमका आधारमा हिमालयन रिइन्स्योरेन्स, सीएचडीसी, नेपाल पुनर्बीमा, गार्डियन माइक्रोलाइफ इन्स्योरेन्स र सिन्धु विकास उत्कृष्ट पाँचभित्र पर्न सफल भए ।