२०८१ चैत ११ गते १८:५९ 
११ चैत, बुटवल। संकटा क्लब काठमाडौ बुटवलमा जारी २३ औ तिलोत्तमा गोल्ड फुटबल प्रतियोगिताको सेमिफाइनलमा प्रवेश गरेको छ ।
एन्फा टेक्निकल सेन्टरको मैदानमा सोमबार भएको खेलमा जर्जियन फुटबल क्लब कालिम्पोङ भारतलाई शून्यका विरुद्ध चार गोलले हराउंदै संकटाले सेमिफाइनलमा स्थान पक्का गरेको हो ।
अब संकटाले फाइनलमा पुग्न सशष्त्र प्रहरीको एपीएफ क्लबसंग चैत १३ गते पहिलो सेमिफाइनल खेल्ने छ ।
संकटाको जितका लागि मिड फिल्डर श्रीजन राज गौतमले पहिलो हाफमा एक गोल र दोस्रो हाफमा तीन गोल गरे । उनै गौतम म्यान अफ द म्याच घोषित भए ।
मंगलबार भोलि मच्छिन्द्र फुटबल क्लब काठमाडौं र एडोर्न गडवाल स्पोर्टिङ क्लब देहरादुन भारतबीच दिउंसो ३ बजे खेल हुने आयोजक एन्फा रुपन्देहीका महासचिव हिमाल गौचनले जानकारी दिए ।
चैत १६ गतेसम्म सञ्चालन हुने प्रतियोगिताको विजेता टिमले नगद १२ लाख १२ हजार र उपविजेता टिमले ६ लाख, ६६ हजार रुपैया नगद पुरस्कार प्राप्त गर्नेछन् ।
यस्तै विधागत उत्कृष्ट खेलाडीहरुलाई गोलरक्षक, डिफेन्डर, मिड फिल्डर, फरवार्ड र प्रशिक्षकलाई नगद ३१ हजार र कप तथा सर्वोत्कृष्ट खेलाडीलाई स्कुटर वा मोटरसाईकल उपहार प्रदान गरिने गौचनले बताए ।
प्रतियोगितामा भारतका दुई र नेपालका दुई विभागीय सहित ८ टिमले भाग लिएका छन् ।
प्रतिक्रिया 4