कुलमानलाई हटाउने निर्णयमा सेलिब्रेटी असन्तुष्ट

काठमाडौं । कुलमान घिसिङलाई विद्युत प्राधिकरणको कार्यकारी निर्देशकको पदबाट हटाउने सरकारको निर्णयमा सेलिब्रेटी असन्तुष्टि सुनिएका छन् । घिसिङलाई पदमुक्त गर्ने मन्त्रिपरिषद्को निर्णयप्रति उनीहरू आक्रोशित देखिए ।

अभिनेता हरिवंश आचार्यले सरकारको निर्णयप्रति असन्तुष्ट हुँदै फेसबुकमा लेखेका छन्, ‘कुलमान नेपाली कुलकै उज्यालो हुन् । अन्धकार बनाउन हुँदैन थियो ।’ आचार्यले यसअघि महसंचारबाट बिजुलीबारेको विज्ञापन र सिरियल पनि बनाएका छन् ।

अभिनेता केदार घिमिरे ‘माग्ने बुढा’ले लेखेका छन्, ‘कुलमानलाई भुलमान । सालोलाई पालो ।’ निर्देशक तथा कलाकार निश्चल बस्नेतले लेखेका छन्, ‘अनेक गरेर कुलमानलाई हटाएछन् । सायद भ्रष्टहरुको पतन अब कसैले रोक्न सक्दैन ।’

अभिनेत्री स्वस्तिमा खड्काले पनि कुलमानको तस्वीर सेयर गरेर उनीप्रति समर्थन जनाएकी छन् । अभिनेत्री प्रियंका कार्कीले इन्स्टाग्राममा कुलमान हटाइएको समाचार सेयर गर्दै विरोध गरेकी छिन् ।

कलाकार मनिषा कोइराला, नीता ढुंगाना, मनोज गजुरेल, रमेश उप्रेती, कृष्ण मल्ल, रकगायिका अभया सुब्बा, गायक शिव परियार लगायतले पनि कूलमानलाई हटाउने निर्णयप्रति विरोध जनाएका छन् ।

मनिषाले राप्रपा अध्यक्ष राजेन्द्र लिङ्देनको पोस्टसहितका घिसिङबारेका पोस्ट सेयर गरेकी छन् । सोमबार बेलुका बसेको मन्त्रिपरिषद् बैठकले घिसिङलाई पदमुक्त गर्दै हितेन्द्रदेव शाक्यलाई नियुक्त गर्ने निर्णय गरेको थियो ।