+

ललितको कीर्तिमानी बलिङ प्रदर्शनमा पुलिस पीएम कपको फाइनलमा

२०८१ चैत  १२ गते १५:४६ २०८१ चैत १२ गते १५:४६
ललितको कीर्तिमानी बलिङ प्रदर्शनमा पुलिस पीएम कपको फाइनलमा

१२ चैत, काठमाडौं । ललित राजवंशीले कीर्तिमानी बलिङ प्रदर्शन गरेपछि नेपाल पुलिस क्लबले एक खेल अगावै प्रधानमन्त्री कप पुरुष राष्ट्रिय क्रिकेट प्रतियोगिताको फाइनलमा स्थान बनाएको छ ।

मंगलबार देउखुरीमा भएको खेलमा पुलिसले कर्णाली प्रदेशलाई ४४ रनले हराएको हो । पुलिसले दिएको १४८ रनको लक्ष्य पछ्याएको कर्णाली २४ ओभरमा १०३ रनमा अलआउट भयो ।

कर्णालीलाई अलआउट गर्न पुलिसका ललितले ९ ओभरमा ४१ रन दिएर ६ विकेट लिए । एकै खेलमा ६ विकेट उनले यस प्रतियोगितामा तेस्रोपटक लिएका हुन् । ५ वा सोभन्दा बढी विकेट उनले पाँचौंपटक लिए । यसैगरी उनले पीएम कपमा १०० विकेट पूरा गर्दै कीर्तिमान पनि बनाए ।

कर्णालीका रविन्द्र शाहीले ४९ तथा अर्जुन घर्तीले ३० रन बनाउनुबाहेक अन्यले दोहोरो अंकमा रन बनाउन सकेनन् । पुलिसका सागर ढकालले २ तथा करण केसीले १ विकेट लिए ।

त्यसअघि अनुज चनाराले ४ तथा दिवान पुनले ३ विकेट लिएपछि नेपाल पुलिस क्लब पनि कम योगफलमै अलआउट भएको थियो । टस हारेर पहिले ब्याटिङको निम्तो पाएको पुलिसले ४८ ओभरमा अलआउट हुँदै १४७ रन बनाएको थियो ।

अर्जुन साउदले सर्वधिक ३६ तथा दिलिप नाथले ३४ रन बनाए । सागर ढकाल २२ रनमा अविजित रहे ।

कर्णालीका अनुजले १० ओभरमा २९ रन दिएर ४ विकेट लिए । कप्तान दिवानले १० ओभरमा २१ रन दिएर ३ विकेट लिए । दिनेश अधिकारी, दिपेन्द्र रावत र सुनिल धमलाले १-१ विकेट लिए ।

हालसम्म अपराजित पुलिस ८ खेलमा १६ अंक जोड्दै फाइनल खेल्ने पक्का भइसकेको छ भने कर्णाली शीर्ष ४ को होडबाट पनि बाहिरिएको छ ।

सन् २०१७ देखि अहिलेसम्म पुलिसको यो चौथो फाइनल हो । साविक विजेता समेत रहेको पुलिसले ३ पटक उपाधि जितेको छ ।

पीएम कप क्रिकेट
लेखक
अनलाइनखबर
यो खबर पढेर तपाईलाई कस्तो महसुस भयो ?
Khusi chhu

खुसी

Dukhi chhu

दुःखी

Achammit chhu

अचम्मित

Utsahit Chhu

उत्साहित

Akroshit Chhu

आक्रोशित

प्रतिक्रिया

भर्खरै पुराना लोकप्रिय