२०८१ चैत १२ गते १६:०४ 
१२ चैत, काठमाडौं । विशाल पटेलले घातक बलिङ गर्दै ६ विकेट लिएपछि मधेश प्रदेशले प्रधानमन्त्री कप पुरुष राष्ट्रिय क्रिकेट प्रतियोगितामा सुदूरपश्चिम प्रदेशमाथि जित हासिल गरेको छ ।
सोमबार एक्स्ट्राटेक ओभल मैदानमा भएको लो स्कोरिङ थ्रिलरमा मधेशले सुदूरलाई ४४ रनले हराएको हो । मधेशले दिएको १०३ रनको लक्ष्य पछ्याएको सुदूर २९ ओभरमा ५८ रनमा अलआउट भयो ।
हेमन्त धामीले १९ रन बनाउनुबाहेक अन्य ब्याटरले दोहोरो अंक छुनै सकेनन् । विशाल पटेलले आफ्नो सुरुवाती ३ ओभरमै ६ विकेट लिएपछि सुदूरले १२ रनमै ७ विकेट गुमाएको थियो ।
त्यसपछि केहीबेर सम्हालिन खोजेपनि खेल भने जित्न सकेन । विशालले ६ ओभरमा १८ रन दिएर ६ विकेट लिए । प्रदिप पासवानले ३ तथा रुपेश सिंहले १ विकेट लिए ।
त्यसअघि शेर मल्ल र हेमन्त धामीले किफायती बलिङ गरेपछि मधेश प्रदेश पनि सामान्य योगफलमा अलआउट भएको थियो । एक्स्ट्राटेक ओभल मैदानमा टस हारेर पहिले ब्याटिङको निम्तो पाएको मधेशले ४२.३ ओभरमा अलआउट हुँदै १०२ रन मात्र बनायो ।
प्रदिप पासवानले सर्वाधिक २३ तथा पवन सर्राफले १९ रन बनाए । दिपेश दास र रुपेश सिंहले समान १२ रन बनाए । सुदूरका शेर मल्लले १० ओभरमा ५ रन मात्र दिएर ४ विकेट लिए । यो पीएम कपमै सबैभन्दा किफायती बलिङ हो । त्यस्तै हेमन्तले ५.३ ओभरमा ११ रन दिएर ४ विकेट लिए । नारायण जोशी र विकास आग्रीले १-१ विकेट लिए ।
दुवै टोली शीर्ष ४ को होडबाट पनि बाहिरिसकेका छन् ।
प्रतिक्रिया 4