१२ चैत, काठमाडौं । नेपाल सुपर लिग (एनएसएल) को पहिलो संस्करणको च्याम्पियन टोली काठमाडौं रेजर्सले तेस्रो संस्करणका लागि जर्सी सार्वजनिक गरेको छ । काठमाडौं रेजर्सले मंगलबार एक कार्यक्रमकाबीच एनएसएलको तेस्रो संस्करणका लागि आधिकारिक जर्सी सार्वजनिक गरेको हो ।
क्लबका ओनरहरु राहुल अग्रवाल, को ओनर क्याबिनेट श्रेष्ठ तथा क्लबका निर्देशक विज्ञानराज शर्मा, क्लबका मुख्य प्रशिक्षक प्याट्रिक डे विल्ड, पूर्व मिस नेपाल जेनिशा मोक्तान, कलाकार तथा मोडल कविता नेपालीले संयुक्त रुपमा जर्सी सार्वजनिक गरेका हुन् । रेजर्सले सेतो र रातो गरी दुई रङको जर्सी सार्वजनिक गरेको हो ।
एनएसएलको तेस्रो संस्करण यही चैत १६ गते शनिबार देखि सुरु हुँदैछ । जहाँ काठमाडौं रेजर्ससहित ७ फ्रेन्चाइज टिमले प्रतिस्पर्धा गर्नेछन् । काठमाडौले उद्घाटन खेलमा साविक विजेता ललितपुर सिटी एफसीसँग प्रतिस्पर्धा गर्नेछ ।
काठमाडौंका ओनर तथा निर्देशकले यस पटक क्लबको कोचिङ स्टाफ देखि खेलाडीहरु राम्रो रहेकोले उपाधि जित्ने विश्वास व्यक्त गरेका छन् ।
काठमाडौंले तेस्रो सिजनका लागि रोहन कार्कीलाई मार्की प्लेअर चयन गर्दै बेल्जियमको अनुभवी प्रशिक्षक प्याट्रिक विल्डलाई भित्र्याएको छ । यस्तै राष्ट्रिय टिमका फरवार्ड जिलेस्पी जंग कार्की देखि राष्ट्रिय टिमबाट खेलिसकेका दिनेश हेन्जन, कमल श्रेष्ठ लगायत खेलाडी टिममा छन् ।
क्लबले दोस्रो संसक्रणमा टिममा रहेका गोलकिपर अभिषेक बराल, डिफेण्डर कुलदिप कार्की र मिडफिल्डर दिपेश गुरुङलाई पनि रिटेन गरेको छ ।
यस्तै काठमाडौंले फ्रान्सदेखि सेनेगल, सियरालेओन र उज्वेकिस्तानको खेलाडी समेत अनुबन्ध गरेको छ । काठमाडौंले ६ विदेशी खेलाडी अनुबन्ध गरिसकेको छ ।
अब ट्यालेन्ट हन्ट र क्याटेगोरी डी को खेलाडी राख्न बाँकी छ । यस्तै एनआरएनएको कोटामा पनि खेलाडी राख्न पाउने विकल्प छ ।
यस्तो बन्यो काठमाडौं रेजर्सको टिम
गोलकिपर : अभिषेक बराल, मौसम मगर, चेइख गुएय
डिफेण्डर : कुलदिप कार्की, कमल श्रेष्ठ, दिवाकर चौधरी, अन्जल महर्जन, पुष्कर खड्का, बकारी माने, अलीजोन अलिजोनोभ
मिडफिल्डर : रोहन कार्की, दिपेश गुरुङ, दिनेश हेन्जन, भरत चौधरी, पेम्बा दोर्जी लामा, भिन्सेन्ट कोजिएला, अमदोउ डिओप
फरवार्ड : जिलेस्पी जंग कार्की, आशिष चापागाईँ, मोहम्मद बुया तुरे
प्रतिक्रिया 4