‘कमेडी नाइट विथ च्याम्पियन्स’को ट्रेलर : यस्तो छ भब्य सेट र नयाँ संरचना

काठमाडौं । टेलिभिजन शो ‘कमेडी नाइट विथ च्याम्पियन्स’को रोचक ट्रेलर सार्वजनिक भएको छ । १९ चैतदेखि प्रसारण तयारीमा रहेको शोको ट्रेलरले भब्य र आकर्षक सेटसहित कलाकारको क्यारेक्टर लुक्स र माहोल पेश गर्छ ।

विशाल भण्डारी होस्ट तथा निर्देशक रहेको शोको ट्रेलरमा दीपकराज गिरी र जितु नेपाल पाहुनाको रुपमा देखिएका छन् । भर्‍याङमाथिबाट उनीहरूको स्टेजमा प्रवेश भएपछि मञ्चमा लगातार कमेडियनको आगमन हुन्छ ।

पालैपालो सबै हाँस्य कलाकारले प्रस्तुति दिएका छन् । उनीहरूले होस्ट तथा निर्देशक भण्डारी, दुबैजना पाहुना र अध्यक्ष दीपाश्री निरौलालाई समेत रोस्ट गरेको देख्न सकिन्छ । व्यक्तिगत प्रवृत्तिलाई ब्यंग्यसहित मुलुकको सामसामयिक मुद्दालाई पनि कलाकारले रोस्ट गरेका छन् ।

भव्य सेट र नयाँ संरचनाले दर्शकलाई मोहित तुल्याउन सक्छ । प्रभात लामा, भरतमणि पौडेल, कैलाश कार्की, सन्तोष थापा, पवन भट्टराई, सजन श्रेष्ठ, सुमन कार्की, मेक्सम गौडेल र सुमन कोइरालाले शोमा प्रस्तुति दिएका छन् ।

एक वर्षसम्म ५२ एपिसोड तयार गर्ने र त्यसपछि ‘कमेडी च्याम्पियन’मा जुट्ने निर्माता कम्पनी थ्री प्रोडक्सन प्रालिको तयारी छ । यो शो हिमालय टिभीमा प्रसारण र युट्युबमा ओएसआर रियालिटी च्यानलबाट स्ट्रिमिङ हुनेछ । हिमालय टिभीमा चैत १९ देखि प्रत्येक मंगलबार राती ८ बजेदेखि शो प्रसारण हुनेछ ।