सरकारले भन्यो : राजावादीको तीनकुने प्रदर्शन हिंसात्मक, कानुन उल्लंघन गर्नेलाई कारबाही हुन्छ

१५ चैत, काठमाडौं । सरकारले पूर्वराजाका समर्थकहरूबाट काठमाडौंको तीनकुनेमा भएको हिंसात्मक प्रदर्शनप्रति मन्त्रालयको गम्भीर ध्यानाकर्षण भएको जनाएको छ।

राजावादी समर्थकले तीनकुने क्षेत्रमा संविधान प्रदत्त विचार र अभिव्यक्तिको स्वतन्त्रता र बिना हातहतियार शान्तिपूर्वक भेला हुने स्वतन्त्रताको उपहास गरेको गृह मन्त्रालयका सहसचिव छवि रिजालले जारी गरेको विज्ञप्तिमा छ ।

‘व्यक्तिका निजी सम्पत्ति, अस्पताल, सञ्चार गृह, राजनीतिक दलका कार्यालय, व्यापारिक केन्द्र लगायत यातायातका साधनहरूमाथि भएको तोडफोड र आगजनीका अमानवीय एवं अमर्यादित घटनाहरू गैरकानुनी तथा घोर भर्त्सनायोग्य रहेका छन् । यस्ता हिंसात्मक एवं आपराधिक घटना गर्ने गराउने कार्यका लागि प्रदर्शनका आयोजक स्वयं नै पूर्ण रुपमा जिम्मेवार छन्,’ विज्ञप्तिमा भनिएको छ ।

संविधानले सबै वर्ग, जाति, भाषा, लिङ्ग, क्षेत्र र धार्मिक अधिकारको संरक्षण गर्दै लोकतान्त्रिक शासन व्यवस्थाको उच्चतम उपयोग गर्ने मार्ग प्रशस्त गरेकै छ । शान्तिपूर्ण तरिकाले विचार प्रकट गर्ने लोकतान्त्रिक विधिको सट्टा हिंसापूर्ण एवं अराजनीतिक खालका गतिविधिहरूबाट कोही कसैको भलाई हुँदैन । अतः यस प्रकारका अमानवीय र गैरकानुनी गतिविधिमा संलग्न नहुन सरकारले आम नागरिकसँग अपिल समेत गरेको छ ।

कानुनको उल्लंघन गर्ने जोसुकैलाई पनि कानुनको दायरामा ल्याई विधिको शासन स्थापित गर्ने कार्यमा सरकार प्रतिबद्ध रहेको जनाएको छ ।