तीनकुनेबाट भागेर विवादास्पद धर्मगुरुको घरमा पुगेका थिए दुर्गा प्रसाईं

१६ चैत, काठमाडौं । तीनकुनेमा भएको हिंस्रक राजावादी प्रदर्शनपछि भागेका दुर्गा प्रसाईं इमाडोलमा रहेको एक धर्मगुरुको घरमा बसेको पाइएको छ ।

विवास्पद धर्मगुरु पुष्कर खतिवडाको घरमा उनी केही समय बसेको पाइएको प्रहरीले जनाएको छ । जिल्ला प्रहरी परिसर, ललितपुरका प्रमुख एसएसपी श्यामकृष्ण अधिकारीका अनुसार, इमाडोलबाट खतिवडालाई प्रहरीले शनिबार बिहान पक्राउ गरेर ल्याएको थियो ।

त्यसक्रममा उनले प्रसाईं प्रदर्शनपछि आफ्नो घरमा आएको बयान दिएका हुन् । ‘प्रारम्भिक सोधपुछमा उहाँले त्यस्तो बताउनु भएको हो, थप बयान लिन पाएको छैन’, अधिकारीले अनलाइनखबरसँग भने, ‘स्याउ र केरा खाएर त्यहाँबाट निस्किएको भनेर भनेका छन् ।’

त्यसपछि उनी घरबाट निस्किएको उनले बताएका छन् ।

खतिवडा शुक्रबार भएको प्रदर्शनमा भिडलाई उत्तेजित बनाउने कार्यमा संलग्न थिए । उनले प्रहरीलाई ढुंगा हान्दै गरेको भिडियो समेत सामाजिक सञ्जालमा भाइरल छ ।

प्रहरीको विशेष टोलीले खतिवडालाई शनिबार बिहान पक्राउ गरेर ललितपुर प्रहरीलाई बुझाएको थियो । ललितपुर प्रहरीले उनलाई काठमाडौं प्रहरीलाई बुझाउने तयारी गरेको छ । ‘थप अनुसन्धान जिल्ला प्रहरी परिसर, भद्रकालीबाटै हुन्छ’, अधिकारीले भने ।

शुक्रबार भएको प्रदर्शनले हिंसात्मक रुप लिँदा २ जनाको मृत्यु र २२ जना घाइते भएका थिए । प्रहरीले यो मामलामा आन्दोलनको नेतृत्व गरेका राजावादी नेताहरु रवीन्द्र मिश्र, धवलशमशेर राणा, स्वागत नेपाल लगायतलाई पक्राउ गरेको छ ।

आन्दोलनका घोषित संयोजक ८६ वर्षीय नवराज सुवदीलाई भने स्वास्थ्य कारण देखाउँदै घरमै नियन्त्रणमा लिएर राखेको छ ।

जनकमाण्डर भनिएका दुर्गा प्रसाईंको खोजी जारी छ । उनीविरुद्ध व्यक्ति हत्या आरोपमा समेत अनुसन्धान गर्ने प्रहरी तयारी छ ।

यो पनि पढ्नुहोस

राजावादी विध्वंशको स्थलगत : अनि, रणमैदान बन्यो तीनकुने

यो पनि, 

प्रदर्शनकारी उक्साउँदै गाडी चलाएर सुरक्षाकर्मीलाई ठेल्दै अघि बढेका थिए प्रसाईं

दुर्गा प्रसाईंको दोहोरो चरित्र : बाहिर व्यवसायीको आलोचना, भित्र असुली