जनताले हामीबाट सुधार खोजेका छन्, सच्याउन आवश्यक छ : शर्मा

१६ चैत, काठाडौं । नेकपा माओवादी केन्द्रका उपमहासचिव जनार्दन शर्माले सबै दलहरुले आफूलाई सुधार गर्दै परिवर्तनका बाँकी काम पूरा गर्ने जिम्मेवारी लिनुपर्ने बताएका छन् ।

शनिबार काठमाडौंमा आयोजित एक कार्यक्रमलाई सम्बोधन गर्दै उनले निरन्तर सुधारको बाटोबाट मात्रै परिवर्तनको बाँकी काम पूरा हुने दाबी गरे ।

राजनीतिक दलहरूले पनि आफ्ना व्यवाहार सुधार गर्दै अघि बढ्नुपर्ने उनको भनाइ थियो ।

‘परिवर्तनको वाहक नेकपा माओवादी पार्टी र सबै दलहरूले आफूलाई सुधार्दै, सच्याउँदै परिवर्तनको बाँकी काम पूरा गर्ने जिम्मेवारी लिनुपर्छ । निरन्तर सुधारको बाटोबाट मात्रै यो सम्भव छ,’ शर्माले भने, ‘जनताले आज हामीबाट सुधार मागिरहेका छन् । सुधार खोजिरहेका छन् । हरेक क्षेत्रमा सुधार गर्ने प्रतिवद्धता र आफ्ना कमजोरीको आत्मलोचना गर्दै जनताको भावनालाई सम्बोधन गर्नुपर्ने आवश्यकता छ ।’

आफ्ना कमजोरीको आत्मलोचनासहित जनताको भावनालाई सम्बोधन गर्नुपर्ने आवश्यकता रहेको बताउँदै उनले आन्दोलनकारीहरूको माग, भावनालाई सम्बोधन गर्नुपर्ने बताए ।