+
+
Shares
संगीत :

सिड्नीमा सातौंपटक गुञ्जियो ‘नेपथ्य’, आइतबार थपियो अर्को शो

आफ्नो समयमा देखेको नेपथ्य र अहिले छोराबुहारीको समयमा हेर्दै गरेको नेपथ्यका बीच धेरै अन्तर आइसकेको उनले बताइन् । ‘पहिलेका गीतहरू पनि अहिले सुन्न पाउँदा रमाइलो लागिरहेको छ,’ उनले भनिन्, ‘तर थुप्रै नयाँ गीत अनि प्रस्तुतिमा नवीनताले अहिलेका युवा पनि उत्तिकै रमाएको देखेँ ।’

अनलाइनखबर अनलाइनखबर
२०८१ चैत १७ गते ११:४२

सिड्नी (अस्ट्रेलिया) । पृथ्वीको दक्षिणी गोलार्धमा रहेको सहर सिड्नीमा नेपथ्यले अहिलेसम्मकै भव्य कन्सर्ट प्रस्तुत गरेको छ । साढे पाँच हजार दर्शकले भरिभराउ ‘होर्डन पभिलियन’ मा ब्याण्डले शनिबार साँझ प्रस्तुति दिएको हो ।

कन्सर्टका लागि तीन साता अगावै टिकट बिक्री भइसकेको थियो । शो सुरु हुनुभन्दा निकै अघि हल खचाखच भइसकेको थियो । जब मञ्चमा कलाकार उपस्थित भए, चर्को आवाज र उफ्राइका साथ दर्शकले स्वागत गरे । उनीहरूका लागि नेपथ्यले पूर्वी नेपालको पदयात्रामा संकलित गीत ‘कोशीको पानी’ बाट प्रस्तुति थालनी गर्‍यो ।

शो दुई घण्टा चलिन्जेलसम्मै सिंगो हल नेपथ्यसँग नाचेको थियो । कुनाकाप्चामा समेत दर्शकका टाउकै टाउका देखिन्थे । भीड व्यवस्थापनमा जताततै सुरक्षाकर्मी खटिएका थिए । हलमा कोही सपरिवार थिए, कोही युवकयुवतीको जोडी । गीतैपिच्छे एक अधबैंसे महिला र एक जोडी युवकयुवती कुर्सीबाट उठेर एकले अर्कालाई समात्दै नृत्य गरिरहेका भेटिए ।

‘आफू तन्नेरी छँदा नेपथ्यको कन्सर्ट असाध्यै मन पथ्र्यो,’ छोरा सुशान्त र बुहारी जस्मिनासँग नाच्दै गरेकी सरिता दाहाल भनिरहेकी थिइन्, ‘अहिले छोरा बुहारीसँग आउँदा पनि उस्तै रमाइलो लागिरहेको छ ।’

काठमाडौं कोटेश्वरकी सरिता ६ महिना पहिले परिवार भेट्न सिड्नी आएकी थिइन् । ‘नेपथ्यको शो झन्डै २८ वर्षपहिले काठमाडौंमै हेरेकी थिएँ,’ उनले भनिन्, ‘अहिले अस्ट्रेलिया आएको बेला पनि शो हुँदै छ र त्यसमा छोराबुहारी जाँदै छन् भन्ने थाहा पाएपछि म पनि साथ लागेँ ।’

आफ्नो समयमा देखेको नेपथ्य र अहिले छोराबुहारीको समयमा हेर्दै गरेको नेपथ्यका बीच धेरै अन्तर आइसकेको उनले बताइन् । ‘पहिलेका गीतहरू पनि अहिले सुन्न पाउँदा रमाइलो लागिरहेको छ,’ उनले भनिन्, ‘तर थुप्रै नयाँ गीत अनि प्रस्तुतिमा नवीनताले अहिलेका युवा पनि उत्तिकै रमाएको देखेँ ।’

‘होर्डन पभिलियन’ हलमा नेपथ्य दोस्रो पटक प्रस्तुत भएको हो । त्यसभन्दा पहिले यहाँकै लुना पार्कमा ब्याण्ड गुन्जिएको थियो । ६ वर्षअघि लुना पार्कमा कन्सर्ट आयोजना गर्दा सबै टिकट इन्टरनेटबाटै बिक्री भइदियो । त्यसपछि अझ फराकिलो हल होर्डन पभिलियनमा नेपथ्यले प्रस्तुति दिएको थियो । यसपाला यस हलमा शनिबारका लागि निर्धारित शोमा पनि पहिल्यै टिकट ‘सोल्ड आउट’ भएपछि शो थपिएको छ । यही हलमै नेपथ्यले आइतबार पनि प्रस्तुति दिनेछ ।

‘सिड्नीमा लगातार भइरहेको दर्शकको वृद्धिले उत्साहित छौं,’ नेपथ्यलाई व्यवस्थापन गर्दै आएको नेपालयका किरणकृष्ण श्रेष्ठ भन्छन्, ‘यसले आगामी दिनमा अझ आकर्षक योजना बनाउन हामीलाई उत्प्रेरित गरेको छ ।’

त्यहाँ आमा जेसिन्टाका साथमा छोरी रुथ र छोराहरू म्याडी अनि ह्याट्रिकको टोली बेग्लै पाराले रमाइरहेका देखिन्थे । घुमफिरमा रमाउने जेसिन्टा तीनपटक नेपाल पुगेकी रहेछिन् । आफ्ना सन्तानलाई पनि एक-एकपटक नेपाल घुमाइसकेकी रहिछन् ।

ह्याट्रिक हाल क्यानबेरास्थित ‘नेसनल कन्भेन्सन सेन्टर’ मा काम गर्दा रहेछन्, जहाँ केही साताअघि नेपथ्यले प्रस्तुति दिएको थियो । त्यो कन्सर्टका बेला ह्याट्रिकले ‘फ्रन्ट अफ हाउस अडियो’ सम्हालेका थिए । ‘कामको सिलसिलामा नेपथ्यको शो हेरेपछि म असाध्यै प्रभावित भएँ,’ ह्याट्रिकले भने, ‘नेपाल भनेपछि हुरुक्क हुने मेरी आमालाई यो कन्सर्ट सिड्नीमा हुन लागेको सुनाएँ अनि तपाईंले छुटाउन हुँदैन पनि भनेँ ।’

यो कन्सर्टका साथ नेपथ्यले अस्ट्रेलियाकै यस व्यापारिक राजधानीमा सातौंपटक सफलताका साथ आफूलाई उभ्याएको छ । अस्ट्रेलियाभरमै सबैभन्दा बढी नेपाली बसोबास गर्ने सिड्नीमा नेपथ्यले सन् २००९ मा पहिलोपटक प्रस्तुति दिएको थियो ।

‘नेपालकै पनि सर्वाधिक प्रस्तुत भएको ठाउँको हाराहारीमा उभिने सिड्नी मेरो निम्ति घरजस्तै आत्मीय सहर भइसकेको छ,’ नेपथ्यका मुख्य गायक एवं अगुवा अमृत गुरुङ भन्छन्, ‘यो सहरबाट पाउने हौसलाले हामीमा हरेकपटक आत्मबल थप्ने गरेको छ ।’

कन्सर्टका बेला अमृतले आफ्ना सन्तानमा पनि नेपाली भाषाको विस्तार गर्न अनि नेपालमा पढ्न नपाएका केटाकेटीको शिक्षामा गच्छेअनुसार थोरै भए पनि योगदान गर्न दर्शकलाई अनुरोध गरेका थिए ।

कार्यक्रम सफलतापूर्वक सम्पन्न भएकामा सिड्नीका स्थानीय आयोजक प्रदीप पाठकले सबैप्रति आभार प्रकट गरेका छन् । ‘सिड्नीको पहिलो कन्सर्ट भव्य रूपले सम्पन्न भयो,’ उनले थपे, ‘थोरै समयको तयारीमा घोषणा गरिए पनि आइतबार यसै हलमा आयोजित दोस्रो शोमा पनि उल्लेख्य दर्शक जुट्ने अपेक्षा राखेका छौं ।’

मञ्चमा अमृतलाई ड्रमसेटमा ध्रुव लामा, बेस गितारमा सुविन शाक्य, गितारमा नीरज गुरुङ, मादलमा शान्ति रायमाझी र किबोर्डमा दिनेशराज रेग्मीले सघाएका थिए । कलाकारको यो टिमबाहेक व्यवस्थापक र प्राविधिकको १४ सदस्यीय टोली यात्रामा सरिक छ । सिड्नीमा आइतबार प्रस्तुति दिएर ब्यान्ड भोलिपल्टै स्वदेश फर्कने कार्यक्रम छ ।

यो खबर पढेर तपाईलाई कस्तो महसुस भयो ?
Khusi chhu

खुसी

Dukhi chhu

दुःखी

Achammit chhu

अचम्मित

Utsahit Chhu

उत्साहित

Akroshit Chhu

आक्रोशित

प्रतिक्रिया

भर्खरै पुराना लोकप्रिय
Advertisment

छुटाउनुभयो कि ?