त्रिविका उपकुलपतिले राजीनामा दिनुको कारण थाहा पाएको छैन : शिक्षामन्त्री

१७ चैत, काठमाडौं । शिक्षा, विज्ञान तथा प्रविधिमन्त्री विद्या भट्टराईले त्रिभुवन विश्वविद्यालयका उपकुलपति प्राध्यापक डा. केशरजंग बरालले किन राजीनामा दिएको भन्नेबारे आफूलाई कुनै जानकारी नरहेको बताएकी छिन् ।

आइतबार सिंहदरबारमा बसेको शिक्षा, स्वास्थ्य तथा सूचना प्रविधि समितिको बैठकमा सांसदहरुले उठाएका प्रश्नको जवाफ दिने क्रममा उनले सो विषयमा आफू अनविज्ञ रहेको बताएकी हुन् ।

शनिबार बिदा परेकाले आफूसमक्ष सो जानकारी नआएको र आजसम्म आउने उनले विश्वास व्यक्त गरिन् ।

‘हिजो बिदाको दिन भयो । त्यसकारण आजसम्ममा थाहा हुन्छ । त्यसपछि हामी जानकारी गराउनेछौँ । समितिलाई जानकारी गराउनेछौँ,’ उनले भनिन्, ‘जसरी यहाँहरूले मिडियामार्फत् थाहा पाउनुभयो, मेरो पनि स्रोत त्यही नै हो । किनभने उपकुलपतिले बुझाउनका लागि शिक्षा मन्त्रालय आउन बिदा भयो हिजो । त्यसकारण आज दिउँसोसम्म थाहा होला ।’

किन राजीनामा दिनुभएको हो भन्नेबारेमा औपचारिक जानकारी नरहेकाले औपचारिक तवरबाट जानकारी पाएपछि मात्रै समितिलाई जानकारी गराउने प्रतिवद्धता जनाए ।

‘मैले अनौपचारिक जानकारी लिने एउटा पक्ष रह्यो । तर मैले विश्वविद्यालयमै जानकारी लिनेकुरा रहन्छ । सहकुलपतिले निर्देशन दिनसक्ने भन्ने मात्रै हो । अरु कुराको सबै जानकारी लिने मात्रै हो । जानकारी अनौपचारिक हिसाबले लिन पाइयो,’ मन्त्री भट्टराईले भनिन्, ‘तर औपचारिक हिसावले कुनैपनि जानकारी हामीसमक्ष नआइपुगेको हुँदा यो बैठकमा जानकारी गराउन सक्दिन । अर्को बैठकमा सबैकुरा बुझेर आइसकेपछि यहाँहरूलाई पुनः जानकारी गरोन प्रतिवद्धता जनाउँछु ।’

उपकुलपति प्रा.डा. बरालले विश्वविद्यालयको उपकुलपतिबाट राजीनामा दिइसकेका छन् । स्वास्थ्य अवस्थाको कारण देखाउँदै उनले राजीनामा बुझाएको स्रोतले बताएको छ ।