दोस्रो इटहरी मेयर कप क्रिकेट प्रतियोगिता चैत २१ देखि

१९ चैत, काठमाडौं । इटहरीमा दोस्रो इटहरी मेयर कप अन्तरपालिका स्तरीय क्रिकेट प्रतियोगिता आयोजना हुने भएको छ। यही चैत २१ देखि ३० गतेसम्म जनता क्रिकेट पार्क (डिभिएम) इटहरी-९ मा  प्रतियोगिता आयोजना हुन लागेको हो ।

सेभेन स्टार क्लब इटहरीद्वारा आयोजित यस प्रतियोगितामा १८ वटा टिमहरू सहभागी हुनेछन् । प्रतियोगिता २०/२० ओभरको नकआउट ढाँचामा आईसीसीको नियमअनुसार सञ्चालन हुनेछ।

नेपालमा क्रिकेट खेलको बढ्दो लोकप्रियता र कोशी प्रदेशका विभिन्न जिल्लाहरूमा क्रिकेटको स्तर उन्नत गर्नका लागि यो प्रतियोगिता महत्वपूर्ण योगदान पुर्याउने विश्वास गरिएको छ। यस प्रतियोगितामा इटहरी उपमहानगरपालिका र अन्य नगरपालिका तथा गाउँपालिकाहरूका क्रिकेट टिमहरू प्रतिस्पर्धा गर्नेछन्।

सहभागी नगरपालिकाहरूमा इटहरी, धरान, विराटनगर, इनरूवा, धनकुटा, इलाम, उदयपुर, झापा, मोरङ लगायतका क्षेत्रका टिमहरू समावेश छन्।

इटहरी उपमहानगरपालिकाका तीन टिमहरू (रातो, निलो, हरियो), धरान उपमहानगरपालिका, विराटनगर महानगरपालिकाको ६ नं. वडा, इनरूवा नगरपालिका, धनकुटा नगरपालिका, माई नगरपालिका (इलाम), त्रियुगा नगरपालिका (उदयपुर), रामधुनी नगरपालिका (सुनसरी), विर्तामोड नगरपालिका (झापा), दमक नगरपालिका (झापा), पथरीशनिश्चरे नगरपालिका (मोरङ), बुद्धशान्ति गाउँपालिका (झापा), भोक्राहा नरसिंह गाउँपालिका (सुनसरी), कटहरी गाउँपालिका (मोरङ), बेलबारी नगरपालिका (मोरङ), र सुन्दरहरैचा नगरपालिका (मोरङ) सहभागी रहेका छन्।

प्रतियोगिताको विजेताले नगद १ लाख रुपैयाँ प्राप्त गर्नेछन् भने उपविजेताले ५० हजार रुपैयाँ प्राप्त गर्नेछन्।  म्यान अफ द सिरिज, सर्वोत्कृष्ट ब्याटर, सर्वोत्कृष्ट बलर र म्यान अफ द म्याच लगायतका पुरस्कारहरू पनि तय गरिएको छ।

यस प्रतियोगिताको उद्देश्य इटहरीमा क्रिकेटको विकास र सुविधासम्पन्न क्रिकेट मैदानको निर्माणमा सहयोग पुर्याउनु रहेको जनाइएको छ। इटहरीको क्रिकेट समुदाय र खेलप्रेमीहरूको ठूलो समर्थनको अपेक्षामा यस आयोजनालाई सफल बनाउन आग्रह गरिएको छ।